ٹوکیو اولمپک میں طلائی تمغہ جیتنے والے ہندوستانی ایتھلیٹ نیرج چوپڑا امریکہ میں ٹریننگ حاصل کر رہے ہیں

ہندوستان کے شاندار ایتھلیٹ نیرج چوپڑا نے ٹوکیو اولمپک میں  طلائی تمغہ جیت کر ہندوستان کا نام پوری دنیا میں روشن کردیا تھا۔ انہوںنےاولمپک کھیلوں میں گولڈ میڈل جیتنے والے پہلے ہندوستانی ایتھلیٹ ہونے کا اعزاز حاصل کیا تھا اور تاریخ رقم کر دی تھی۔جیولین تھرو(نیزہ پھینک) کے ایتھلیٹ نیرج چوپڑا ٹوکیو اولمپک میں ملنے والی کامیابی کو ماضی کا حصہ قرار دیتے ہیں اور ان کا کہنا ہے کہ اب ان کی توجہ مستقبل پر مرکوز ہے اور وہ ملک کےلئے مزید کامیابیاں حاصل کرنے کے خواہاں ہیں اوراسی بات پر انہوںنے اپنی ساری توجہ مرکوز کر رکھی ہے۔واضح رہے کہ ہندوستانی ایتھلیٹ نیرج چوپڑا نے ٹوکیو اولمپک کے دوران ۷؍اگست کو ۸۷ء۵۸؍میٹر دور نیزہ پھینک کر ہندوستان کےلئے ایتھلیٹک مقابلوں میں پہلا گولڈ میڈل حاصل کیا تھا۔ ہندوستانی ایتھلیٹ آئندہ ہونے والے ٹورنامنٹوں اور چمپئن شپ کی تیاریوں کے سلسلے میں امریکہ میں موجود ہیں جہاں وہ اپنے کوچ کلاز بارتینیز کی نگرانی میں ۹۰؍دنوں تک ٹریننگ حاصل کریںگے۔یاد رہے کہ ہندوستانی کھیل فیڈریشن (سائی) نے گزشتہ جمعہ کوبغیر کسی تاخیر کے ان کی ٹریننگ کی درخواست کو منظور کر لیا تھا۔نیرج چوپڑا نے سوشل میڈیا پر ٹویٹ کرتے ہوئے کہا کہ ’’یہ وقت ماضی کی کامیابیوں کو بھلا کرمستقبل میں ہونے والے ٹورنامنٹ پر توجہ مرکوز کرنے کا ہے۔میں ٹریننگ کےلئے امریکہ پہنچ گیا ہوں اور اپنے کھیل کو مزید بہتر کرنے کی کوشش کرنے میں لگ گیا ہوں۔‘‘
 یاد رہے کہ ٹارگیٹ اولمپک پوڈیم اسکیم (ٹاپس) کے تحت نیرج چوپڑا کو امریکہ روانہ کیا گیا ہے۔ان کی اس ٹریننگ پر ۳۸؍لاکھ روپے خرچ ہوںگے۔اس تعلق سے نیرج چوپڑا نے لکھا کہ ’’سائی کے ڈائریکٹر،ٹاپس اور اے ایف آئی کے افسران اور میرے اس دورے میں مدد کرنے والے تمام لوگوں کا میں شکریہ اداکرنا چاہتا ہوں۔‘‘