فن ایلن نے جارحانہ بلے بازی کرتے ہوئے ۵۰؍ رن بنائے۔ جیکٹ ڈفی نے ۴؍کھلاڑیوں کو آؤٹ کیا

 فن ایلن (۵۰؍ رن) کی طوفانی نصف سنچری، ٹِم سیفرٹ (۴۴؍ رن) اور کپتان مائیکل بریسویل (ناٹ آؤٹ  ۴۶؍ رن) کی شاندار بلے بازی کے بعد جیکب ڈفی (۴؍ وکٹ) اور زکری فاکس (۳؍ وکٹ) کی عمدہ بولنگ کی بدولت نیوزی لینڈ نے اتوارکو چوتھے ٹی۲۰؍ میچ میں پاکستان کو۱۱۵؍ رن سے شکست دے کر ۵؍ میچوں کی سیریز میں ایک۔۳؍ کی ناقابلِ تسخیربرتری حاصل کر لی۔
 ۲۲۱؍رن کے ہدف کے تعاقب میں پاکستان کی شروعات انتہائی خراب رہی  اور صرف ۲؍ اوورس میں ۹؍رن  کے اسکور پر ۳؍ وکٹ گنوا بیٹھا۔ محمد حارث (۲) کو ولیم او رورک نے بولڈ کیا  جبکہ حسن نواز (ایک) اور آغا سلمان (ایک) کو جیکب ڈفی نے پویلین بھیج دیا۔ اس کے بعد بیٹنگ کیلئے  آنے والے عرفان خان نے کریز پر رکنے کی کوشش کی، لیکن نیوزی لینڈ کے شاندار بولنگ اٹیک کے سامنے کوئی بھی پاکستانی بلے باز زیادہ دیر تک نہیں ٹھہر سکا۔
شاداب خان (ایک)، خوشدل شاہ (۶؍رن)، عباس آفریدی (ایک) اور شاہین شاہ آفریدی (۶؍ رن) معمولی اسکور بنا کر آؤٹ ہوئے۔ عرفان خان نے پاکستان کیلئے ۲۴؍ رن کی اننگز کھیلی۔ پاکستان کا ۹؍واں وکٹ حارث رؤف (۶؍رن) کی شکل میں گرا، جنہیں جیکب ڈفی نے آؤٹ کیا۔ ٹیم کی جانب سے عبدالصمد نے سب سے زیادہ۴۴؍رن  بنائے۔ ایش سوڈھی نے۱۷؍ویں اوور کی دوسری گیند پر عبدالصمد کو آؤٹ کر کے پاکستان کی اننگز۱۰۵؍رن پر سمیٹ دی۔ عبدالصمد نے۳۰؍ گیندوں پر ۴؍ چوکوں اور ۲؍ چھکوں کی مدد سے۴۴؍ رن بنائے۔ نیوزی لینڈ کی جانب سے جیکب ڈفی نے ۴؍ اور فاکس نے ۳؍ وکٹ حاصل کئے۔ 
 اتوار کوپاکستان کے کپتان آغا سلمان نے ٹاس جیت کر پہلے گیندبازی کا فیصلہ کیا۔ بیٹنگ کیلئے  اتری نیوزی لینڈ کی اوپننگ جوڑی فِن ایلن اور ٹِم سیفرٹ نے شاندار آغاز کرتے ہوئے پہلے وکٹ کیلئے ۵۹؍ رن کی طوفانی شراکت کی۔ حارث رؤف نے ٹِم سیفرٹ کو آؤٹ کر کے اس شراکت کو توڑا۔ ٹِم سیفرٹ نے۲۲؍گیندوں پر ۳؍ چوکوں اور۴؍ چھکوں کی مدد سے ۴۴؍ رن کی اننگز کھیلی۔
۹؍ویں اوور میں حارث رؤف نے ۱۶؍ گیندوں پر۲۴؍ رن بنانے والے مارک چیپ مین کو آؤٹ کر کے پویلین بھیج دیا۔ ۱۱؍ویں اوور میں عباس آفریدی نے فِن ایلن کو آؤٹ کر کے نیوزی لینڈ کو بڑا جھٹکا دیا۔ فِن ایلن نے۲۰؍ گیندوں پر ۶؍ چوکوں اور ۳؍ چھکوں کی مدد سے۵۰؍ رن بنائے۔ جیمس نیشام (۳) اور مشیل ہے (۳) کو آؤٹ کر کے پاکستانی گیند بازوں نے میچ میں واپسی کی۔مشیل  ہےکے آؤٹ ہونے کے بعد بیٹنگ کیلئے آئے کپتان مائیکل بریسویل نے ڈیرل مشیل کے ساتھ اننگز کو سنبھالا اور تیز رفتاری سے رن بھی بٹورے۔
۱۹؍ویں اوور کی دوسری گیند پر حارث رؤف نے ڈیرل مشیل (۲۹؍رن) کو آؤٹ کر کے پاکستان کو چھٹی کامیابی دلائی۔ مائیکل بریسویل نے ۲۶؍ گیندوں پر ۵؍ چوکوں اور ۲؍ چھکوں کی مدد سے  ناٹ آؤٹ ۴۶؍ رن کی اہم اننگز کھیلی۔ فاکس ۳؍ رن بنا کر ناٹ آؤٹ رہے۔نیوزی لینڈ نے مقررہ۲۰؍ اوورس میں ۶؍ وکٹ کے نقصان پر۲۲۰؍ رن کا بڑا اسکور کھڑا کیا۔ پاکستان کی جانب سے حارث رؤف نے ۳؍ وکٹ، جبکہ ابرار احمد نے ۲؍ وکٹ حاصل  کئے۔