کیوی ٹیم نے سری لنکا کو ۷؍وکٹ سے شکست دے کر سیریز برابر کردی۔کپتان سوزی بیٹس نے ۴۷؍رن بنائے۔

کپتان سوزی بیٹس (۴۷؍رن) اور بروک ہالیڈے (ناٹ آؤٹ۴۶ ؍ رن) کی شاندار بلے بازی کے بعد شاندار گیند بازی کا مظاہرہ کرتے ہوئے نیوزی لینڈ کی خواتین نے اتوار کو دوسرے ٹی۲۰؍ میچ میں سری لنکا کو ۹؍ گیند باقی رہ کر ۷؍ وکٹ سے شکست دے دی۔ اس کے ساتھ ہی نیوزی لینڈ نے ۳؍ میچوں کی سیریز۱۔۱؍ سے برابر کر لی ہے۔
۱۱۴؍رن  کے ہدف کے تعاقب میں نیوزی لینڈ کی خواتین کی شروعات خراب رہی کیونکہ اس نے دوسرے ہی اوور میں جارجیا پلیمر (۴؍رن) کو گنوا دیا۔ ایما میکلوڈ۱۱؍  رن بنا کر پویلین لوٹ گئی۔ بروک ہالیڈے نے کپتان سوزی بیٹس کے ساتھ مل کر اننگز کا آغاز کیا۔ دونوں بلے بازوں نے تیسری وکٹ کے لیے۴۳؍ رن جوڑے۔۱۵؍ ویں اوور میں انوشی پریادرشینی فرنانڈو نے سوزی بیٹس  کو آؤٹ کر کے سری لنکا کو تیسری کامیابی دلائی  تاہم اس وقت تک نیوزی لینڈ فتح کی دہلیز پر پہنچ چکا تھا۔ نیوزی لینڈ نے  ۱۸ء۳؍اوورس میں ۳؍ وکٹ پر۱۱۷؍رن بنا کر ۷؍ وکٹ سے میچ جیت لیا۔ بروک ہالیڈے (۴۶) اور ایزی شارپ (۸؍رن ) ناٹ آؤٹ رہے۔  سری لنکا کی جانب سے انوشی پریادرشینی فرنانڈو، سوگندھیکا کماری اور اچینی کلسوریا نے ایک ایک بلے باز کو آؤٹ کیا۔
اس سے قبل اتوار کو نیوزی لینڈ کی خواتین ٹیم نے ٹاس جیت کر پہلے فیلڈنگ کا فیصلہ کیا۔ سری لنکا کی بیٹنگ کی اچھی شروعات نہیں تھی، اس نے پہلے ہی اوور میں وشمی گنارتنے (صفر) کو کھو دیا۔ اس کے بعد سری لنکا نے جلد ہی وقفے میں مزید ۳؍ وکٹ گنوا  دیئے۔ ہرشیتھا سماراویکرما (۱۱)، چماری اٹاپٹو (۲۳؍رن) اور کاویشا دلہری (۱۲؍رن) کو آؤٹ کیا۔ ایک وقت سری لنکا ۵۳؍رن  کے اسکور پر ۴؍ وکٹ گنوانے کے بعد مشکل میں تھا۔ ایسے وقت میں مانودی نانایاکارا اور نیلکشیکا سلوا نے اننگز کو سنبھالنے کی کوشش کی۔ دونوں بلے بازوں کے درمیان۵؍ویں وکٹ کیلئے ۵۳؍ رن  کی شراکت ہوئی۔ یہ شراکت۱۹؍ویں اوور میں ٹوٹی جب مانودی نانایاکارا ۳۵؍رن آؤٹ ہوئے۔سری لنکا نے۲۰؍ویں اوور میں اپنی ۷؍ویں وکٹ سوگندھیکا کماری (ایک) کی صورت میں گنوائی۔ سری لنکن ٹیم نے مقررہ۲۰؍ اوورس میں ۷؍ وکٹ پر ۱۱۳؍رن   بنائے۔