آج ہندوستانی باکسر پیرس اولمپکس میں اپنی مہم کا آغاز کریں گی۔ جرمن مکے باز سے سخت ٹکر متوقع۔

ہندوستانی باکسر نکہت زرین پیرس اولمپکس میں اتوار کو نارتھ پیرس ایرینا میں اپنے پہلے میچ کےلئے تیار ہیں۔ دو بار کی عالمی چمپئن زرین ٹرائلز میں میری کوم سے ہارنے کے بعد ٹوکیو۲۰۲۰ء اولمپکس سے باہر ہو گئی تھیں۔ انہوں نے تب سے دو  عالمی خطاب، ایک کامن ویلتھ گیمز میں گولڈ اور گزشتہ سال کے ایشین گیمز میں کانسے کے تمغے سمیت کئی اہم کامیابیاں حاصل کی ہیں۔
زرین راؤنڈ آف۳۲؍ میں جرمنی کی میکسی کیرینا کلوٹزر کے خلاف اپنی مہم کا آغاز کریں گی۔ کامیاب کارکردگی کے بعد راؤنڈ آف۱۶؍ میں ان کا مقابلہ چین کی وو یو سے ہو سکتا ہے۔ باکسر وو یو، پیرس۲۰۲۴ء میں خواتین کی۵۰؍ کلوگرام کیٹیگری میں ٹاپ سیڈ اور ایشین گیمز کی  چمپئن  رہنے والی، ۵۲؍ کلوگرام کیٹیگری میں ورلڈ خطاب بھی اپنے نام کر چکی ہیں۔۵۰؍ کلوگرام وزن کے زمرے میں موجودہ عالمی چمپئن زرین کو ایک سخت چیلنج کا سامنا ہے۔ پیرس اولمپکس باکسنگ کیلئے سیڈنگ کا تعین براعظمی کوالیفائرس کے نتائج سے کیا گیا تھا۔