میگنس کارلسن نے آؤٹ آف فارم ڈنگ لیرن کو شکست دے کر ۱۲؍ پوائنٹس کے ساتھ سنگلز کی برتری حاصل کی۔

ہندوستانی بھائی بہن کی جوڑی آر پراگنانندہ  اور آر ویشالی کو ناروے شطرنج ٹورنامنٹ کے چھٹے راؤنڈ میں شکست کا سامنا کرنا پڑا جبکہ میگنس کارلسن نے آؤٹ آف فارم ڈنگ لیرن کو شکست دے کر ۱۲؍ پوائنٹس کے ساتھ سنگلز کی برتری حاصل کی۔ امریکی فابیانو کاروانا نے ہم وطن ہیکارو ناکامورا کو شکست دے کر کارلسن کو ۶؍ کھلاڑیوں کے ڈبل راؤنڈ رابن ٹورنامنٹ میں برتری حاصل کرنے میں مدد کی۔
 پراگنانندہ کو کلاسیکل میچ میں فرانس کی فیروزہ علی رضا کے خلاف تھوڑی جدوجہد کرنی پڑی لیکن پھر آرماگیڈن ٹائی بریکر میں ہار گئے۔ اس کی بہن ویشالی کو خواتین کی عالمی چمپئن چین کی وینجن سو سے شکست کا سامنا کرنا پڑا۔ اب کھیلوں کے ۴؍ راؤنڈ باقی ہیں، ٹاپ رینک والے کارلسن کے بعد ناکامورا آتے ہیں جن کے۱۱؍ پوائنٹس ہیں جبکہ پراگنانندہ ۹ء۵؍ پوائنٹس کے ساتھ تیسرے نمبر پر ہیں۔ علی رضا ۸؍ پوائنٹس کے ساتھ چوتھے نمبر پر ہیں اور کاروانا۶ء۵؍ پوائنٹس کے ساتھ ۵؍ویں نمبر پر ہیں جبکہ چین کی ڈنگ لیرین اب تک صرف۲ء۵؍ پوائنٹس حاصل کر پائی ہے۔
 خواتین کے زمرے میں وینجن سو اور اینا موزیچک نے ویشالی پر برتری حاصل کی ہے۔ وینجن سو اور موزیچک دونوں کے۱۰ء۵؍ پوائنٹس ایک جیسے ہیں جبکہ ویشالی ان سے آدھا پوائنٹ پیچھے ہے۔ موزیچک نے چین کے ٹنگجی لی کو آرماگیڈن ٹائی بریکر میں شکست دی۔ لی ۷؍ پوائنٹس کے ساتھ چوتھے نمبر پر ہے۔ وہ ایک اور ہندوستانی کھلاڑی کونیرو ہمپی سے ۲؍ پوائنٹ آگے ہیں۔ ہمپی کو آرماگیڈن میں سویڈن کی پیا کریملنگ کے ہاتھوں ایک اور شکست کا سامنا کرنا پڑا۔ کریملنگ کے ۴ء۵؍ پوائنٹس ہیں اور وہ ٹیبل کے نیچے ہے۔