اولمپکس ۲۰۲۴ء کا باقاعدہ آغاز ہوچکا ہے۔ کھیل گاؤں میں مختلف ممالک کے کھلاڑیوں کی بھیڑ ہے۔ اس دوران ہندوستانی کھلاڑیوں کو خوراک کی کمی اور پکوانوں کے متعلق مسائل کا سامنا کرنا پڑ رہا ہے۔

ہندوستانی کھلاڑی اولمپک گیمز میں شرکت کیلئے پیرس پہنچ گئے ہیں۔ کھلاڑیوں کے مابین ہم آہنگی کیلئے فرانس نے پیرس کے شمال میں تقریباً ۷؍ کلومیٹر کے فاصلے پر واقع سینٹ ڈینس، ایلے سینٹ ڈینس اور سینٹ اوون کے قریب کھیل گاؤں بنایا ہے۔ ۱۳۳۹؍ کروڑ روپے کی لاگت سے بنائے گئے خوبصورت کھیل گاؤں میں پہنچنے کے بعد ہندوستانی کھلاڑی بہت خوش ہیں لیکن کھانے کی کمی نے انہیں پریشان کردیا ہے۔ دراصل، پیرس اولمپکس کے کھیل گاؤں میں ہندوستانی کھلاڑیوں کے کھانے کے متبادل کافی محدود ہیں۔ ان میں سے کچھ ہندوستانی کھلاڑی مکمل طور پر سبزی خور ہیں۔

Step into the future at the Paris 2024 Olympic Village!🌏✨#parisolympics pic.twitter.com/VtWdvsFz82

— Sports Authority of Gujarat (@sagofficialpage) July 22, 2024

کھانا وقت سے پہلے ختم ہو گیا 
ہندوستانی ڈبلز بیڈمنٹن کھلاڑی تنیشا کرسٹو نے کہاکہ آج کھانے میں راجما تھا لیکن جب تک ہم وہاں پہنچے، وہ ختم ہوچکا تھا۔ اب بتاؤ ہم کیا کریں ؟ کچھ دیگر ہندوستانی کھلاڑیوں نے بھی اس بارے میں شکایت کی ہے اور کہا ہے کہ اتنی جلدی کھانا ختم ہونا بہت مایوس کن ہے۔ واضح رہے کہ کھیل گاؤں میں عالمی کھانوں، حلال، ایشیائی اور فرنچ کھانے کیلئے ۵؍ الگ الگ ہال ہیں۔
 
باکسر امیت پنگھل کا انحصار دال اور روٹی پر ہے 
 باکسر چند روز قبل کھیل گاؤں پہنچے تھے۔ مسلسل دوسری بار اولمپک گیمز میں حصہ لینے والے تجربہ کار باکسر امیت پنگھل نے کہا کہ لنچ معیاری نہیں تھا۔ پنگھل نے اپنی معاون ٹیم سے کہا کہ وہ رات کے کھانے کیلئے دال اور روٹی کا بندوبست کرے اور اب وہ اسی پر منحصر ہیں۔
 
ہندوستانی کھلاڑیوں کو۳۰؍ اپارٹمنٹس ملے
اولمپک گیمز میں ۱۱۷؍ ہندوستانی کھلاڑی حصہ لے رہے ہیں گے، جن کی رہائش کیلئے اسپورٹس ولیج میں ۳۰؍ اپارٹمنٹس فراہم کئے گئے ہیں۔ ۷؍ منزلہ بلاکس کو باہر سے ترنگے کے رنگوں میں پینٹ کیا گیا ہے۔ ہندوستانی ٹیم سے وابستہ ایک عہدیدار نے کہا کہ کھلاڑی صرف یہاں کے ماحول سے لطف اندوز ہونا چاہتے ہیں۔ جب مقابلے شروع ہوں گے تو وہ اس کے بارے میں سوچیں گے۔