جونیئر ورلڈ چمپئن کی ۱۰؍ میٹر ایئر رائفل میں انفرادی اور ٹیم مقابلوں میں کامیابی حاصل کی

 پارتھ راکیش مانے نے جونیئر ورلڈ چمپئن شپ کی۱۰؍ میٹر ایئر رائفل میں انفرادی اور ٹیم مقابلوں میں شاندار کارکردگی کا مظاہرہ کرتے ہوئے ڈبل گولڈ میڈل جیت لیا۔ پیر کو انٹرنیشنل شوٹنگ اسپورٹ فیڈریشن (آئی ایس ایس ایف) جونیئر ورلڈ چمپئن  شپ میں۱۰؍ میٹر ایئر رائفل کا انفرادی خطاب جیتنے کے بعد پارتھ نے اجے ملک اور ابھینو شا کے ساتھ مردوں کے۱۰؍ میٹر ایئر رائفل ٹیم ایونٹ میں بھی طلائی تمغہ جیتا۔
 گوتمی بھانوٹ، شمبھاوی کشیرساگر اور انوشکا ٹھوکر کی ہندوستانی خواتین کی ٹیم نے۱۰؍ میٹر ایئر رائفل میں۱۸۹۴ء۸؍ کے مشترکہ اسکور کے ساتھ طلائی تمغہ جیت کر ایک نیا جونیئر عالمی ریکارڈ قائم کیا۔ ان ۳؍ طلائی تمغوں کے ساتھ جونیئر شوٹنگ ورلڈ چمپئن شپ میں ہندوستان کے تمغوں کی تعداد ۸؍ ہو گئی ہے۔ ہندوستان نے اب تک ٹورنامنٹ میں ۵؍ گولڈ اور ۳؍ کانسے کے تمغے جیتے ہیں۔
مردوں کے مقابلوں میں پارتھ مانے، اجے ملک اور ابھینو شا نے۱۸۸۳ء۵؍ کا اسکور بنا کر ٹیم ٹائٹل اپنے نام کیا۔ پارتھ مانے نے مردوں کی۱۰؍ میٹر ایئر رائفل فائنل میں۱۰ء۰؍ سے اوپر لگاتار شاٹس کے ساتھ شاندار کارکردگی کا مظاہرہ کیا۔ اس کا ۲۵۰ء۷؍  کا اسکور چین کی لیوان لن ہوانگ (۲۵۰ء۰) کو پیچھے چھوڑ کر ٹاپ پوزیشن پر آگیا۔  امریکہ کے بریڈن وین پیجر نے۲۲۹ء۱؍ کے اسکور کے ساتھ کانسہ کا تمغہ جیتاجبکہ پیرس۲۰۲۴ء اولمپکس کے چاندی کا تمغہ جیتنے والے وکٹر لِنڈگرین ۲۰۷ء۲؍ کے اسکور کے ساتھ چوتھے نمبر پر رہے۔
اجے ملک شوٹ آف میں لنڈگرین سے ہار گئے اور۱۸۶ء۷؍ کے اسکور کے ساتھ پانچویں نمبر پر رہے۔ ابھینو شا، جنہوں نے گزشتہ سال انفرادی گولڈ جیتا تھا، اپنے خطاب کا دفاع نہیں کر سکے اور ۱۴۴ء۲؍ کے ساتھ ۷؍ویں نمبر پر رہے۔ اس سے قبل کوالیفائنگ راؤنڈ میں اجے ملک۶۲۸ء۸؍ کے اسکور کے ساتھ دوسرے نمبر پر رہے تھے۔ پارتھ مانے(۶۲۷ء۷ ) چوتھے جبکہ ابھینو شا (۶۲۷ء۰) چھٹے نمبر پر رہے۔
ہندوستانی نشانے بازوں نے ٹیم ایونٹ میں ۱۸۸۳ء۵؍ کے مشترکہ اسکور کے ساتھ پوڈیم میں سرفہرست رہے اور امریکہ(۱۸۷۷ء۶)  اور جرمنی (۱۸۷۳ء۹) کو پیچھے چھوڑ دیا۔  کوالیفائنگ راؤنڈ کے ۸؍ شوٹرس نے انفرادی فائنل۱۰؍ میٹر ایئر رائفل فائنل کیلئے  کوالیفائی کیا۔ خواتین کے کوالیفکیشن راؤنڈ میں گوتمی بھانوٹ (۶۳۴ء۷)  دوسرے نمبر پر رہیں جبکہ شمبھاوی کشر ساگر(۶۳۲ء۶)  اور انوشکا ٹھوکر (۶۲۷ء۵)   بالترتیب چوتھے اور پانچویں نمبر پر رہیں۔ تینوں کے۱۸۹۴ء۸؍ کے مشترکہ اسکور نے انہیں یو ایس اے(۱۸۸۱ء۸)  اور ناروے (۱۸۷۶ء۷) کو شکست دے کر ٹائٹل جیتنے میں مدد کی۔