گوالیار کے میدان پر ہندوستانی ٹیم نے فیلڈنگ کوچ ٹی دلیپ کے ساتھ کیچ کی مشق کی۔ ہیڈ کوچ گوتم گمبھیر نے کھلاڑیوں کی نگرانی کی۔

ہندوستانی کرکٹ ٹیم اتوار کو گوالیار میں بنگلہ دیش کے خلاف پہلے ٹی ۲۰؍ میچ کی تیاری کر رہی ہے۔ فیلڈنگ کوچ ٹی دلیپ اور اسسٹنٹ کوچ ریان ٹین ڈوشیٹ کی جانب سے تیاری کیلئے کی گئی فیلڈنگ مشقوں میں کھلاڑیوں کو پسینہ بہاتے ہوئے دیکھا گیا۔ جمعہ کو بی سی سی آئی کے آفیشل ایکس ہینڈل پر پوسٹ کئے جانے والے ایک ویڈیو میں ٹیم کا ٹریننگ سیشن دکھایا گیا۔ گوالیار میں ٹیم پورے فارم کے ساتھ مشق کرتی ہوئی نظرآئی۔ 
ٹیم انڈیا نے ہندوستان بمقابلہ بنگلہ دیش ٹی ۲۰؍ سیریز کے افتتاحی میچ سے قبل اپنی فیلڈنگ کی مہارت کو بہتر بنایا ہے۔ ویڈیو میں دلیپ تکنیک کی اہمیت پر زور دیتے ہوئے ہندوستانی کھلاڑیوں کو ہدایات دیتے ہوئے نظر آرہے ہیں۔ انہوں نے کہا کہ جہاں آپ پھینک رہے ہو وہاں اپنے پیر جمائیں، یہ اتنا آسان ہے۔ میں شدت پر توجہ نہیں دے رہا ہوں، لیکن فارم اور بہاؤ کچھ چیزیں ہیں جنہیں آج ہم بہتر کرنے کی کوشش کررہے ہیں۔ ایک بار جب ہم اس میں کامیاب ہو گئے تو ہم آگے بڑھیں گے اورکم ازکم ۱۵؍ کیچ لیں گے۔ 
آل راؤنڈر ہاردک پانڈیا اور اسپنر ورون چکرورتی کو پریکٹس کے دوران نمایاں کوششیں کرتے ہوئے دیکھا گیا۔ ہیڈ کوچ گوتم گمبھیر نے کھلاڑیوں پر کڑی نظر رکھی کیونکہ وہ فیلڈنگ پریکٹس میں مصروف تھے۔ اس کے علاوہ، ہندوستان کی ٹی ۲۰؍ ٹیم کے کپتان سوریہ کمار یادو، اوپننگ بلے باز ابھیشیک شرما اور اسپنر روی بشنوئی کو کچھ قابل ذکر کیچ لیتے ہوئے دیکھا گیا۔ خیال رہے کہ ٹیسٹ سیریز کے بعد ہندوستان اور بنگلہ دیش کی ٹیمیں ۳؍ میچوں کی ٹی ۲۰؍ سیریز میں آمنے سامنے ہوں گی۔ 
آپ کو بتاتے چلیں کہ سوریہ کمار یادو اگلی سیریز میں ایک بار پھر کپتانی کرتے ہوئے نظر آئیں گے۔ سنجو سیمسن اور جیتیش شرما ٹیم میں وکٹ کیپر بلے باز ہوں گے۔ اس کے علاوہ نظریں اوپنر ابھیشیک شرما پر ہوں گی۔ ریان پراگ اور نتیش کمار ریڈی بھی خصوصی توجہ کے کھلاڑی تھے۔ ٹیم میں مینک یادو کو بھی موقع دیا گیا ہے۔ 
سیریز کا پہلا میچ۶؍ اکتوبر کو گوالیار میں کھیلا جائے گا، اس کے بعد دوسرا اور تیسرا میچ بالترتیب ۹؍ اکتوبر (دہلی) اور۱۲؍ اکتوبر (حیدرآباد) میں کھیلا جائے گا۔ بنگلہ دیش کے خلاف سیریز کیلئے ہندوستان کا ٹی ۲۰؍ اسکواڈ: سوریہ کمار یادو (کپتان)، ابھیشیک شرما، سنجو سیمسن (وکٹ کیپر)، رنکو سنگھ، ہاردک پانڈیا، ریان پراگ، نتیش کمار ریڈی، شیوم دوبے، واشنگٹن سندر، روی بشنوئی، ورون چکرورتی، جیتیش شرما (وکٹ کیپر)، ارشدیپ سنگھ اور مینک یادو۔ 
بنگلہ دیش کا اسکواڈ: نظم الحسین شانتو (کپتان)، تنزید حسن تمیم، پرویز حسین ایمن (وکٹ)، توحید ہردوئے، محمود اللہ، لٹن داس (وکٹ)، ذاکر علی انیک (وکٹ)، مہدی حسن میراز، مہدی حسن، رشاد حسین، مستفیض الرحمان، تسکین احمد، شوریٰ الاسلام، تنظیم حسن ثاقب، مستفیض الرحمان، رقیب الحسن۔