ہندوستان نے پہلی اننگز میں ۹؍ وکٹ پر ۲۵۲؍رن بنائے۔ جڈیجا اور راہل کی نصف سنچری۔ ہندوستان اب بھی ۱۹۳؍رن پیچھے۔

بارڈر گاوسکر ٹرافی کے ہندوستان اور آسٹریلیا کے درمیان کھیلے جانے والے تیسرے ٹیسٹ میچ کے چوتھے دن منگل کو بارش کی وجہ سے ہونے والے میچ میں ہندوستان نے کے ایل راہل ۸۴، رویندر جڈیجا ۷۷؍ اور آکاش دیپ ناٹ آؤٹ۲۷؍رن کےشاندار نصف سنچری اننگز کی مدد سے ۹؍ وکٹ پر۲۵۲؍ رن بنائے ہیں۔ دن کے کھیل کے اختتام پر جسپریت بمراہ (ناٹ آؤٹ ۱۰؍رن) اور آکاش دیپ (ناٹ آؤٹ ۲۷؍رن) کریز پر موجود ہیں۔ 
 لنچ کے بعد بارش رکی تو رویندر جڈیجا اور نتیش کمار ریڈی کی جوڑی بلے بازی کے لئے آئی اور۵۳؍ رن کی اہم شراکت کی۔۶۰؍ویں اوور میں پیٹ کمنس نے نتیش کمار ریڈی (۱۶؍رن) کو بولڈ کر کے اس شراکت کو توڑا۔ ۵؍ رن بعد مشیل اسٹارک نے محمد سراج (ایک) کو آؤٹ کر کے ہندوستان کو آٹھواں جھٹکا دیا۔ اس دوران جڈیجا ایک کنارے کو مضبوطی سے تھامے رہے۔ جڈیجا نے۸۲؍ گیندوں پر اپنی نصف سنچری مکمل کی۔ یہ ان کے ٹیسٹ کریئر کی ۲۲؍ویں ففٹی ہے۔ اس کے بعد پیٹ کمنس نے رویندر جڈیجا کو ایم مارش کے ہاتھوں کیچ آؤٹ کروا کر آسٹریلیا کو ۹؍ویں کامیابی دلائی۔ جڈیجا نے۱۲۳؍ گیندوں پر۷۷؍ رن کی اننگز کھیلی، ۷؍ چوکے اور ایک چھکا لگایا اور ۷۵؍ ویں اوور میں آکاش دیپ نے پیٹ کمنس کی دوسری گیند پر چوکا لگا کر ہندوستان کو دھچکے سے بچالیا۔ دن کا کھیل ختم ہونے پر ہندوستان نے ۹؍ وکٹوں پر۲۵۲؍ رن بنائے تھے اور جسپریت بمراہ ( ناٹ آؤٹ ۱۰؍ رن ) اور آکاش دیپ ( ناٹ آؤٹ ۲۷؍ رن) کریز پر موجود تھے۔ ہندوستان اب بھی آسٹریلیا کے پہلی اننگز میں بنائے گئے ۴۴۵؍ رن سے۱۹۳؍ رن پیچھے ہے۔ 
اس سے پہلے منگل کو ہندوستان نے ۴؍ وکٹ پر۵۱؍ رن سے کھیلنا شروع کیا۔ ٹیم کے اسکور میں صرف۲۳؍ رن کا اضافہ ہوا تھا کہ پیٹ کمنس نے ۱۰؍ کے اسکور پر روہت شرما کو اپنا شکار بنا کر آسٹریلیا کو پانچواں جھٹکا دیا۔ راہل اور روہت کے درمیان ۳۰؍ رن کی شراکت ہوئی۔ اس کے بعد بیٹنگ کے لیے آنے والے رویندر جڈیجا اور کے ایل راہل نے چھٹے وکٹ کے لیے ۶۷؍ رن جوڑے۔ اس دوران کے ایل راہل نے اپنے ٹیسٹ کریئر کی ۱۷؍ویں نصف سنچری بنائی۔ اس سیریز میں یہ ان کی دوسری نصف سنچری ہے۔ راہل نے ۱۳۹؍ گیندوں پر ۸؍ چوکوں کی مدد سے ۸۴؍ رن بنائے۔ 
اس سے قبل پیر کو یشسوی۴؍ رن بنانے کے بعد، گل ایک رن بنانے کے بعد، وراٹ ۳؍ رن بنانے کے بعد اور رشبھ پنت ۹؍ رن بنانے کے بعد آؤٹ ہوئے۔ آسٹریلیا کی جانب سے کمنس نے ۴؍ وکٹ حاصل کئے۔ مشیل اسٹارک نے ۳؍ وکٹ لئے۔ ہیزل ووڈ اور ناتھن لاین نے ایک ایک بلے باز کو آؤٹ کیا۔