اپنے بلے بازوں کی زبردست کارکردگی کے بعد آسٹریلیا اور جنوبی افریقہ نے آئی سی سی چمپئن  ٹرافی میں اپنی مہم کا آغاز جیت کے ساتھ کیا تھا۔

اپنے بلے بازوں کی زبردست کارکردگی کے بعد آسٹریلیا اور جنوبی افریقہ نے آئی سی سی چمپئن  ٹرافی میں اپنی مہم کا آغاز جیت کے ساتھ کیا تھا۔ جب وہ منگل کو یہاں آمنے سامنے ہوں گے تو اس بات کا قوی امکان ہے کہ اس  میچ میں رن کی بارش ہوگی۔ ان دونوں ٹیموں کا بیٹنگ کا شعبہ بہت مضبوط ہے اور اس کی وجہ سے یہ میچ بہت دلچسپ ہو سکتا ہے۔
  آسٹریلیا اور جنوبی افریقہ دونوں ہی یہ میچ جیت کر سیمی فائنل کی طرف مضبوط قدم بڑھانا چاہیں گے۔ آسٹریلیا کے کئی اہم کھلاڑی زخمی ہونے کی وجہ سے اس ٹورنامنٹ میں حصہ نہیں لے رہے ہیں۔ اسی لئے بہت کم لوگ اسے دعویداروں میں شامل کر رہے تھے لیکن جس طرح اس نے لاہور میں انگلینڈ کے خلاف ریکارڈ ہدف حاصل کیا اس سے واضح ہو گیا ہے کہ آئی سی سی مقابلوں میں آسٹریلیا کو کم سمجھنا بہت بڑی غلطی ہو گی۔آسٹریلیا کو ٹورنامنٹ میں پیٹ کمنس، مشیل  اسٹارک اور جوش ہیزل ووڈ کی تیز گیند بازی کی تینوں کمی محسوس ہوگی لیکن کم از کم ابتدائی میچ میں بلے بازوں کی شاندار کارکردگی نے ان کی غیر موجودگی کو پورا کیا۔ جوش انگلس نے سنچری بنا کر اپنے کریئر کا بہترین پرفارمنس دیا جس سے وہ پراعتماد ہو جائیں گے۔ اس کے ساتھ میتھیو شارٹ، مارنس لبوشین، ایلکس کیری اور گلین میکسویل نے بھی مفید شراکت کی۔آسٹریلیا کے بیٹنگ کے شعبے میں صرف کپتان اسٹیو اسمتھ اور اوپنر ٹریوس ہیڈ ہی وہ کھلاڑی تھے جو پہلے میچ میں رن بنانے میں ناکام رہے۔ وہ جنوبی افریقہ کے خلاف اس کا حساب بیباق کرنے کیلئے  پرعزم ہوں گے۔ خیال رہے کہ آسٹریلیا کو بولنگ  کے شعبے میں بائیں ہاتھ کے تیز گیند باز اسپینسر جانسن سے بہتر کارکردگی کی امید ہو گی۔