آئی سی سی ٹی ۲۰؍خواتین عالمی کپ میں جارحانہ کارکردگی کامظاہرہ کرنے والی ہندوستان کی۱۶؍ سالہ نوجوان سلامی بلے باز شیفالی ورما آئی سی سی کی تازہ ٹی ۲۰؍رینکنگ میں بدھ کو سرفہرست مقام پر پہنچ گئی۔

 دُبئی : آئی سی سی ٹی ۲۰؍خواتین عالمی کپ میں جارحانہ کارکردگی کامظاہرہ کرنے والی ہندوستان کی۱۶؍ سالہ نوجوان سلامی بلے باز شیفالی ورما آئی سی سی کی تازہ ٹی  ۲۰؍رینکنگ میں بدھ کو سرفہرست مقام پر پہنچ گئی۔شیفالی نے آسٹریلیا میں جاری عالمی کپ میں شاندار کارکردگی کا مظاہرہ کیا جس کا فائدہ اسے بلے بازوں کی رینکنگ میں ملا۔ شیفالی نے۱۹؍مقامات کی لمبی چھلانگ لگاکر۷۶۱؍ ریٹنگ پوائنٹس کے ساتھ اس فہرست میں پہلا مقام حاصل کرلیا جبکہ نیوزی لینڈ کی سوزی بیٹس ۷۵۰؍ ریٹنگ پوائنٹس کے ساتھ دوسرے مقام پر ہے۔ہندوستان کی اسمرتی مندھانا ۲؍ مقامات گر کر ۷۰۱؍ پوائنٹس کے ساتھ ۷؍ویں مقام پر آگئی ہے جبکہ جمیما راڈریگیز بھی دو مقام پھسل کر ۶۵۸؍پوائنٹس کے ساتھ ۹؍ویں مقام پر پہنچ گئی ہے۔ ہندوستانی ٹی ۲۰؍ٹیم کی کپتان ہرمنپریت کور۶۱۷؍پوائنٹس کے ساتھ۱۲؍ ویں مقام پر قابض ہے۔تیسرے مقام پر آسٹریلیا کی بیتھ مونی ہے جس کے۷۴۶؍ریٹنگ پوائنٹس ہیں۔ نیوزی لینڈ کی کپتان صوفی ڈیوائن۷۴۲؍ پوائنٹس کے ساتھ چوتھے اور آسٹریلیا کی میگ لیننگ ۷۰۸؍پوائنٹس کے ساتھ ۵؍ویں مقام پر ہے۔گیندبازوں کی فہرست میں ہندوستان کی پونم یادو ۴؍ مقامات کی بہتری کرتے ہوئے ۷۰۴؍پوائنٹس کے ساتھ ۸؍ویں مقام پر پہنچ گئی ہے۔ دپتی شرما۷۲۳؍پوائنٹس کے ساتھ ۵؍ویں مقام پر اور رادھا یادو ۷؍ویں مقام پر ہے۔ اس فہرست میں انگلینڈ کی صوفی ایکل اسٹون۷۹۹؍پوائنٹس کے ساتھ پہلے اور آسٹریلیا کی میگن شٹ دوسرے مقام پر ہے۔