تیسرے ٹی۔۲۰؍میچ میں مہمان ٹیم نے ۷؍رنوں سے کامیابی حاصل کی،رچن رویندرا کی محنت رائیگاں،میزبان ٹیم نے سیریز دو ایک سے جیت لی۔

کوسل پریرا کی طوفانی سنچری (۱۰۱)، چریت اسالنکا (۳؍ وکٹ) اور وینندو ہسرنگا (۲؍ وکٹ) کی شاندار گیند بازی کی بدولت جمعرات کو تیسرے ٹی۔ ۲۰؍ میچ میں نیوزی لینڈ کو ۷؍ رنوں سے شکست دےدی۔ تاہم نیوزی لینڈ نے ۳؍ میچوں کی سیریز ایک کے مقابلے ۲؍میچ سے جیت لی۔ کوسل پریرا کو ان کی طوفانی سنچری پر ’پلیئر آف دی میچ‘ اور سیریز میں ۸؍ وکٹ لینے والے نیوزی لینڈ کے بولر جیکب ڈفی کو ’پلیئر آف دی سیریز‘ کے ایوارڈ سے نوازا گیا۔ 
 سری لنکا کے ۲۱۸؍رنوں کے جواب میں نیوزی لینڈ کی اوپننگ جوڑی ٹم رابنسن اور راچن رویندرا نے عمدہ آغاز کیا اور پہلے وکٹ کیلئے۸۱؍ رن جوڑے۔ آٹھویں اوور میں بی فرنینڈو نے ٹم رابنسن (۳۷) کو آؤٹ کر کے اس شراکت داری کو توڑا۔ اس کے بعد چرت اسالنکا نے مارک چیپ مین (۹) اور گلین فلپس (۶) کو آؤٹ کر کے نیوزی لینڈ کو ۲؍ جھٹکے دیئے۔ ۱۳؍ویں اوور میں اسالنکا نے راچن رویندرا کو بولڈ کر کے سری لنکا کو چوتھی کامیابی دلائی۔ راچن نے جارحانہ بلے بازی کرتے ہوئے۳۹؍گیندوں میں ۵؍ چوکے اور ۴؍ چھکے لگاتے ہوئے ۶۹؍ رنوں کی اننگز کھیلی۔ ہ سرنگا نے۱۶؍ویں اوور میں مچل ہو (۸) کو بولڈ کر دیا۔ اسی اوور میں انہوں نے مائکل بریسویل (ایک) کو بھی اپنا شکار بنایا۔ سری لنکا کے لئے ساتویں اہم وکٹ نووان تشارا نے ڈیرل مچل کو آؤٹ کرکے حاصل کی۔ ڈیرل مچل نے ۱۷؍ گیندوں پر ایک چوکا اور ۴؍ چھکے لگا کر ۳۵؍رن بنائے۔ مچل سینٹنر (۱۴) اور جیکری فاکس (۲۱) رن بنانے کے بعد ناٹ آؤٹ رہے۔ نیوزی لینڈ کی ٹیم مقررہ ۲۰؍ اوور میں ۷؍ وکٹوں پر ۲۱۱؍ رن بنا سکی اور ۷؍ رن سے میچ ہار گئی۔ سری لنکا کی جانب سے چرت اسالنکا نے ۳؍ اور وینندو ہسرنگا نے ۲؍ وکٹیں حاصل کیں۔ نووان تشارا اور بی فرنینڈو نے ایک ایک بلے باز کو آؤٹ کیا۔ 
 اس سے قبل نیوزی لینڈ نے ٹاس جیت کر پہلے گیند بازی کا فیصلہ کیا تھا۔ بلے بازی کے لئے آنے والی سری لنکا کی شروعات اچھی نہیں تھی اور اس نے ۲۴؍کے اسکور پر پیتھم نسانکا (۱۴) کی صورت میں اپنا پہلا وکٹ گنوادیا۔ وہ میٹ ہنری کے ہاتھوں وکٹ کیپر مچل ہو کے ہاتھوں کیچ آؤٹ ہوئے۔ اس کے بعد پانچویں اوور میں مچل سینٹنر نے کوسل مینڈس کو بریسویل کے ہاتھوں کیچ آؤٹ کرا دیا۔ کوسل مینڈس نے ۱۶؍گیندوں میں ۲۲؍رن بنائے۔ سری لنکا کا تیسرا وکٹ اویشکا فرنینڈو (۱۷) کی صورت میں گرا۔ وہ جیکب ڈفی کی گیند پر ایل بی ڈبلیو آؤٹ ہوئے۔ تیسرے نمبر پر بیٹنگ کیلئے آنے والے کوسل پریرا اس دوران ایک سرے پر ڈتے رہے۔ اس کے بعد بیٹنگ کیلئے آنے والے کپتان چرت اسالنکا نے کوسل پریرا کے ساتھ مل کر اننگز کو سنبھالا۔ دونوں بلے بازوں کے درمیان چوتھے وکٹ کیلئے۱۰۰؍ رنوں کی شراکت داری ہوئی۔ دونوں نے دھماکہ خیز بلے بازی کا مظاہرہ کیا اور تیزی سے رن بنائے۔ 
 ۱۷؍ویں اوور میں جیکری فاکس نے چرت اسالنکا کو آؤٹ کرکے اس شراکت داری کو توڑا۔ چرت اسالنکا نے ۲۴؍ گیندوں پر ۴۶؍رنوں کی اننگز کھیلی جس میں ایک چوکا اور ۵؍ چھکے شامل تھے۔ ڈیرل مچل نے کوسل پریرا کو ۱۹؍ویں اوور میں آؤٹ کیا۔ کوسل پریرا نے ۴۶؍گیندوں پر ۱۳؍چوکوں اور۴؍ چھکوں کی مدد سے ۱۰۱؍ رنوں کی سنچری اننگز کھیلی۔ ٹی۔ ۲۰؍ میں یہ ان کی پہلی بین الاقوامی سنچری ہے۔ اس کے ساتھ ہی انہوں نے ٹی۔ ۲۰؍میں اپنے ۲؍ ہزار رن بھی مکمل کر لئے۔ سری لنکا نے مقررہ ۲۰؍ اوور میں ۵؍ وکٹوں پر ۲۱۸؍رن بنائے۔ نیوزی لینڈ کی جانب سے میٹ ہنری، جیکب ڈفی، جیکری فاکس، مچل سینٹنر اور ڈیرل مچل نے ایک ایک بلے باز کو آؤٹ کیا۔