پہلے یکروزہ میچ میں آسٹریلیا کو ۴۹؍ رن سے شکست دے دی۔ اسالنکا نے ۱۲۷؍رن بنائے

 کپتان چارتھ اسالنکا (۱۲۷؍رن) کی سنچری اننگز کے بعد مہیش تیکشنا (۴۰؍رن پر ۴؍ وکٹ) کی مہلک گیند بازی کی بدولت سری لنکا نے بدھ کو یہاں آسٹریلیا کے خلاف۴۹؍ رن کی کامیابی حاصل کی۔
 آر پریماداسا اسٹیڈیم میں سری لنکا نے پہلے بیٹنگ کرتے ہوئے۴۴؍ اوورس میں۲۱۴؍ رن  بنائے جس کے جواب میں آسٹریلیا کی ٹیم ۳۳ء۵؍ اوور میں۱۶۵؍ رن پر آل آؤٹ ہوگئی۔ بولرس کی مدد سے اسالنکا نے پچ پر مضبوط عزم اور صبر کا مظاہرہ کیا اور دلیرانہ سنچری اسکور کی جس کے باعث میزبان ٹیم۲۰۰؍ رن کا ہندسہ عبور کرنے میں کامیاب رہی۔ ایک وقت میں سری لنکا کی آدھی ٹیم۵۵؍ رن کے اسکور پر پویلین لوٹ چکی تھی۔ بحران کے ایسے وقت میں اسالنکا نے آگے آکر ٹیم کے اسکور بورڈ کو چلانے کی ذمہ داری اپنے کندھوں پر لے لی۔ انہوں نے ڈینتھ ویلج (۳۰؍رن) کے ساتھ ۶۷؍رن کی اہم شراکت کی اور ٹیم کو مشکلات سے نکالنے میں کامیاب رہے۔ ویلج کے بعد نچلی ترتیب کے بلے بازوں نے کریز پر وقت گزار کر اسالنکا کا ساتھ دیا جس کی وجہ سے  وہ رن جوڑنے میں کامیاب رہے۔
  آسٹریلیا کی اننگز کا آغاز بھی اس وقت مایوس کن ہوا جب اس کے اوپنرس کو لگاتار دو اوورس میں اسیتھا فرنانڈو نے آؤٹ کیا۔ کینگرو ٹیم ابھی ان جھٹکوں سے سنبھل بھی نہیں پائی تھی کہ مہیش ٹیکشنا نے کوپر کونلے (۳) اور ویلج نے کپتان اسٹیو اسمتھ (۱۲) کو آؤٹ کرکے مہمان ٹیم کے ٹاپ آرڈر کی کمر توڑ دی۔ آسٹر یلیا کی جانب سے ایلکس کیری (۴۱) اور ایرون ہارڈی (۳۲) نے اننگز کو سنبھالنے کی کوشش کی لیکن دیگر بلے بازوں کی جانب سے تعاون نہ ملنے کی وجہ سے ان کی کوششیں بے سود ثابت ہوئیں اور مہمان ٹیم کو ایشیائی براعظم میں عبرتناک شکست کا سامنا کرنا پڑا۔