لیما میں جاری ورلڈ کپ میں ہندوستانی جوڑی نے پچھڑنے کے باوجود شاندار کارکردگی کا مظاہرہ کرتے ہوئے گولڈ میڈل پر نشانہ لگایا۔

 ہندوستانی نشانے باز سوروچی سنگھ اور سوربھ چودھری نے آئی ایس ایس ایف ورلڈ کپ ۲۰۲۵ءمیں ۱۰؍میٹر ایئر پسٹل مکسڈ ڈبلز مقابلے میں طلائی تمغہ جیت لیا ہے۔ اس ایونٹ میں سوروچی اور سوربھ نے طلائی تمغہ کے مقابلے میں ۲۔ ۸؍سے پیچھے رہنے کے بعد شاندار واپسی کرتے ہوئے یاؤ کیانکسن اور ہو کائی کی چینی جوڑی کو ۹۔ ۱۷؍سے شکست دی۔ 
 اس سال آئی ایس ایس ایف ورلڈ کپ میں سوروچی کا یہ تیسرا طلائی اور مجموعی طور پر چوتھا تمغہ ہے۔ انہوں نے گزشتہ ہفتے بیونس آئرس میں اور منگل کو لیما میں خواتین کا ۱۰؍میٹر ایئر پسٹل شوٹنگ ایونٹ جیتا تھا۔ انہوں نے بیونس آئرس میں ۱۰؍میٹر ایئر پسٹل مکسڈ ٹیم ایونٹ میں سوربھ کے ساتھ کانسے کا تمغہ بھی جیتا تھا۔ دوسری طرف سوربھ نے بھی مردوں کے ۱۰؍میٹر ایئر پسٹل مقابلے میں کانسے کا تمغہ جیت کر تقریباً ۳؍ بر سوں میں آئی ایس ایس ایف ورلڈ کپ میں اپنا پہلا انفرادی تمغہ جیتا ہے۔ 
 دریں اثنا۱۰؍میٹر ایئر پسٹل مکسڈ ٹیم ایونٹ کے کانسہ کے تمغے کے میچ میں منو بھاکر اور رویندر سنگھ کو ما کیانکے اور ژانگ یفان کی چینی جوڑی نے ۶۔ ۱۶؍سے شکست دی۔ سوروچی سنگھ (۲۹۱) اور سوربھ چودھری (۲۸۹) ۱۰؍میٹر ایئر پسٹل مکسڈ ٹیم ایونٹ کے کوالیفکیشن راؤنڈ میں کُل ملاکر ۵۸۰؍پوائنٹس کے ساتھ دوسرے نمبر پر رہے۔