سید مودی ٹورنامنٹ کے فائنل میں لکشیا نے جیا ہینگ جیسن اور پی وی سندھو نے چین کی وو لو یوکو مات دے دی۔

پیرس اولمپکس میں تمغہ سے محروم رہنے والی دو بار کی اولمپک تمغہ جیتنے والی پی وی سندھو اور لکشیا سین نے یہاں اتوار کو سید مودی انڈیا انٹرنیشنل ایچ ایس بی سی ورلڈ ٹور سپر ۳۰۰؍ بیڈمنٹن چمپئن شپ ۲۰۲۴ءمیں بالترتیب خواتین اور مردوں کے سنگلز کا خطاب جیت لیا۔ ۲۱۰۰۰۰؍ امریکی ڈالر کی انعامی رقم والی چمپئن شپ کے خطابی میچ اتوار کو بابو بنارسی داس اسپورٹس اکیڈمی کے اندر اسٹیڈیم میں کھیلے گئے، جس میں دوسری سیڈیافتہ ترشا جولی اور گایتری گوپی چند نے لکشیا سین اور پی وی سندھو سے پہلے خواتین کے ڈبلز کا خطاب جیتا اگرچہ مکسڈ ڈبلز کا خطاب اور مردوں کا ڈبلز خطاب جیتنے سے ہندوستانی جوڑیاں محروم رہیں۔ 
ٹورنامنٹ میں ٹاپ سیڈ لکشیا نے چوتھی سیڈ سنگاپور کے جیا ہینگ جیسن کو سیدھے گیمز میں ۶۔ ۲۱، ۷۔ ۲۱؍ سے ہرا کر پہلی بار سید مودی بیڈمنٹن کا خطاب جیتا۔ لکشیا کو پہلا گیم جیتنے میں صرف۱۲؍ منٹ لگے جبکہ انہوں نے دوسرا گیم ۱۶؍ منٹ میں جیت لیا۔ 
اس سے قبل ٹاپ سیڈ اسٹار شٹلر پی وی سندھو نے چین کی وو لو یو کو سیدھے گیمز میں ۱۴۔ ۲۱، ۱۶۔ ۲۱؍ سے شکست دے کر تیسری بار سید مودی بیڈمنٹن کا خطاب جیتا۔ سندھو نے اپنے معمول کے جارحانہ انداز میں کھیل کا آغاز کیا اور اپنے حریف کو شاندار اسمیشز اور ڈراپس سے پریشان کرنے میں کامیاب رہی۔ اگرچہ غیر سیڈیڈ یو نے سندھو کا بہادری سے سامنا کیا، لیکن وہ ۴۷؍ منٹ تک جاری رہنے والے میچ میں سندھو کے تجربے کے سامنے گھٹنے ٹیک دیئے۔ 
دوسری جانب ترشا جولی اور گایتری گوپی چند کی دوسری سیڈیافتہ ہندوستانی جوڑی نے۴۱؍ منٹ تک جاری رہنے والے مقابلے میں باو لی جِنگ اور لی کیان کی چینی جوڑی کو۱۸۔ ۲۱، ۱۱۔ ۲۱؍ سے شکست دے کر خواتین کے ڈبلز کا خطاب جیت لیا۔ 
مکسڈ ڈبلز میں دھرو کپیلا اور تنیشا کرسٹو کی غیر سیڈیڈ ہندوستانی جوڑی ڈی پووارانوکروہ اور سوپیسارا پیواسمپران کی چھٹی سیڈیافتہ تھائی جوڑی سے سخت مقابلے میں ۲۱۔ ۱۸، ۱۴۔ ۲۱، ۸۔ ۲۱؍سے ہار گئی۔ اسی طرح مردوں کے ڈبلز میں ہندوستان کے سائی پرتیک اور پرتھوی کرشنا مورتی کے رائے کی جوڑی بھی چین کے ہوانگ دی اور لیو یانگ کی جوڑی سے۱۴۔ ۲۱، ۲۱۔ ۱۹، ۱۷۔ ۲۱؍ سے شکست کھا کر رنر اپ بنی۔