سابق کپتان اسٹیو وا نے کہا کہ ہندوستان کے پاس شاندار بولنگ اٹیک ہے جو میزبانوں کو مشکل میں ڈال سکتا ہے۔دلچسپ مقابلے کی امید کا اظہار کیا۔

آسٹریلیائی کرکٹ ٹیم کے سابق کپتان اسٹیو وا کا کہنا ہے کہ بارڈر۔ گاوسکر ٹرافی بہت دلچسپ ہونے والی ہےکیوں کہ۲؍ بہت اچھی ٹیموں کے درمیان مقابلہ ہوگا۔ ہندوستان کے پاس آسٹریلیا میں جیتنے کا اچھا موقع ہے کیونکہ ان کے پاس بہت اچھا بولنگ اٹیک ہے۔ جسپریت بمراہ اور محمد سمیع جیسے شاندار تیز گیند باز ہیں اور ان کے پاس اسپن کا مضبوط امتزاج بھی ہے۔ وہیں آسٹریلیا کی ٹیم بھی اچھی بولنگ میں پیچھے نہیں ہے۔ 
  سابق کرکٹرا سٹیو وا نے کہا کہ جسپریت بمراہ اور وراٹ کوہلی کی کارکردگی ۵؍ ٹیسٹ میچوں کی بارڈر۔ گاوسکر ٹرافی میں ہندوستان کی جیت میں اہم کردار ادا کرسکتی ہے۔ اسٹیووا نے دونوں ممالک کے درمیان ہونے والی ٹیسٹ سیریز کے تعلق سے کہا کہ ’’یہ ۲؍ بہت اچھی ٹیموں کے درمیان ایک اچھی سیریز ہوگی۔ ٹیم انڈیا کے پاس آسٹریلیا میں جیتنے کا اچھا موقع ہے کیونکہ ان کے پاس بہت مضبوط بولنگ اٹیک ہے۔ بمراہ، محمد سراج اور سمیع شاندار گیندباز ہیں جبکہ رویندر جڈیجہ، آر اشون اور کلدیپ یادو جیسے کئی اچھے اور خطرناک اسپنر بھی ہیں۔ لیکن مجھے لگتا ہے کہ جسپریت بمراہ کی گیند اور بلے کے ساتھ وراٹ کوہلی کی کارکردگی اہم ہوگی۔ گیندباز جتنی زیادہ وکٹیں لیں گے، ہندوستان کے امکانات اتنے ہی زیادہ ہوں گے۔ 
 انہوں نے مزید کہا’’ہم نے بیرون ملک حالات میں وراٹ کی کارکردگی دیکھی ہے۔ ہندوستانی بلے بازی ان پر منحصر ہے، اس لئے وہ ذمہ داری سنبھالیں گے۔ تاہم آسٹریلیا کے پاس بھی بہت اچھی ٹیم ہے، جس کا بولنگ اٹیک بھی مضبوط ہے۔ اس لئے۲؍ اعلیٰ معیاری ٹیموں کے درمیان مجھے امید ہے کہ ایک زبردست سیریز ہوگی جس کا میں بھی منتظر ہوں۔ ‘‘