ہندوستان کی ٹی ۲۰؍ ٹیم کے سابق کپتان نے کہا: عالمی چمپئن بننا ایک خواب کی طرح محسوس ہوتا ہے۔ یہ خواب پورا ہوگیا ہے۔

روہت شرما نے ایک نوزائیدہ بچے کی طرح ٹرافی کو تھام لیا، ان کے چہرے سے ایک پر سکون مسکراہٹ بمشکل غائب تھی۔ جب ٹی ۲۰؍ ورلڈ کپ جیتنے والے کپتان ٹورنامنٹ کے بعد فوٹو شوٹ کیلئے یہاں کے ساحل کی طرف روانہ ہوئے اور ان کا چہرہ روشن نظرآرہا تھا۔ ان کا چہرہ عالمی چمپئن ہونے کے احساس سے بھرا ہوا تھا۔ آخرکار ہندوستانی ٹیم نے ایک دہائی سے زائد عرصے تک ناکام رہنے کے بعد ورلڈ کپ جیت لیا۔ 
روہت نے بی سی سی آئی ٹی وی سے بات چیت کرتے ہوئے اپنے جذبات کو سمجھنے کی کوشش کی اور ہنستے ہوئے کہاکہ `یہ غیر حقیقی محسوس ہوتا ہے۔ یہ ایک خواب کی طرح محسوس ہوتا ہے۔ ایسا ہی ہے جیسے ہوا ہی نہیں۔ حالانکہ ایسا ہو چکا ہے لیکن ایسا لگتا ہے جیسے ہوا ہی نہیں۔ ساحلی شہر برج ٹاؤن طوفان سے نبرد آزما ہے۔ یہی بات ہندوستانی کپتان کے بارے میں بھی کہی جا سکتی ہے لیکن وہ ان جذبات پر قابو پانے کی جدوجہد کر رہے ہیں جو سمندر کی بڑی لہروں کی طرح ہر وقت انہیں گھیرے رہتے ہیں۔ 
روہت شرما نے کہاکہ `کل رات ہم نے اچھا وقت گزارا، ہم نے صبح سویرے تک اپنے ساتھیوں کے ساتھ بہت مزہ کیا۔ وہ خود کو مسکرانے سے نہیں روک سکے اور پھر قدرے جذباتی ہو گئے۔ انہوں نے کہاکہ `میں کہوں گا کہ میں ٹھیک سے نہیں سو سکا لیکن اس سے مجھے کوئی فرق نہیں پڑتا۔ میرے پاس سونے کے لئے کافی وقت ہے۔ میں اس لمحے، ہر منٹ، ہر سیکنڈ کو جینا چاہتا ہوں اور میں اس سے بھرپور فائدہ اٹھانے کی کوشش کروں گا۔ 
انہوں نے بتایا کہ۱۱؍برسوں میں پہلی بار آئی سی سی خطاب جیتنے والی ہندوستانی ٹیم کی قیادت کرنا کیسا لگاتو انہوں نے کہاکہ `میچ کے اختتام سے لے کر اب تک یہ ایک شاندار لمحہ رہا ہے۔ یہ آپ کے جذبات اور احساسات ہیں۔ روہت ٹاپ آرڈر پر بہترین کارکردگی کی بدولت ٹورنامنٹ کی بہترین ٹیم میں جگہ بنانے میں کامیاب رہے۔ روہت نے کہا کہ `ہم نے اتنے لمبے عرصے تک اس کے بارے میں خواب دیکھا، ہم نے ایک ٹیم کے طور پر اتنے لمبے عرصے تک سخت محنت کی اور اسے (ٹرافی) ہمارے ساتھ دیکھ کر بہت راحت محسوس ہوئی۔ 
ٹی ۲۰؍ٹیم انڈیاکے سابق کپتان نے کہاکہ `جب آپ کسی چیز کیلئے سخت محنت کرتے ہیں اور آخر کار آپ کو وہ مل جاتی ہے تو یہ واقعی اچھا لگتا ہے۔ لوگ یہ دیکھ کر حیران اور خوش ہوئے کہ روہت نے کینسنگٹن اوول کی پچ پر جا کر مٹی کا ایک چھوٹا سا ٹکڑا منہ میں ڈال دیا، بالکل اسی طرح جیسے نوواک جوکووچ ومبلڈن جیتنے کے بعد کرتے ہیں۔ ۳۷؍ سالہ کھلاڑی نے کہا کہ یہ اس لمحے کے جذبات میں ہوا۔ 
 روہت نے کہاکہ `اسکرپٹ کے مطابق کچھ نہیں تھا۔ یہ سب کچھ فطری طور پر ہو رہا تھا۔ میں اس لمحے کو محسوس کر رہا تھا۔ انہوں نے کہاکہ `جب میں پچ پر گیا، اس پچ پر جس نے ہمیں یہ ٹرافی دی تھی۔ میں اپنی زندگی میں وہ میدان اور وہ پچ ہمیشہ یاد رکھوں گا۔ میں اس کا ایک ٹکڑا اپنے پاس رکھنا چاہتا تھا۔ روہت نے کہاکہ `وہ لمحات بہت خاص ہیں، وہ جگہ جہاں ہمارے تمام خواب پورے ہوئے اور میں اس کا ایک حصہ چاہتا تھا۔ یاد رہے کہ روہت شرما نے حال ہی میں ختم ہونے والے ٹی ۲۰؍ ورلڈ کپ میں اچھی کارکردگی کامظاہرہ کیا تھا۔ انہوں نے پورے ٹورنامنٹ کی ۸؍اننگز میں ۲۵۷؍رن بنائے تھے۔ ان کا اوسط بھی اچھا تھا جوکہ ۳۶ء۷۱؍ تھا۔ انہوں نے ٹیم کی قیادت بھی بہتر انداز میں کی تھی۔