فائنل میں فاتح ٹیم نے فیورینٹینا کو ایک کے مقابلے ۲؍گول سے شکست دی،سید بینراما نے ٹیم کیلئے ایک گول کیا

 ویسٹ ہیم یونائیٹڈ نے جمعرات کو یوروپا کانفرنس لیگ کے فائنل میں فیورینٹینا کو ایک کے مقابلے۲؍سے شکست دے کر خطاب جیت لیا۔انگلش کلب ویسٹ ہیم یونائیٹڈ نے اطالوی کلب فیورینٹینا کو شکست دے کر ۴۳؍برسوں میں پہلی اور ۱۹۶۵ء کے بعد پہلی بڑی یورپی ٹرافی جیتی ہے۔
 فائنل میچ میں دوسرے ہاف تک اسکور ایک ایک گول سے برابری پر تھا اور ایسا محسوس ہورہا تھا کہ میچ اضافی وقت میں چلا جائےگا لیکن ویسٹ ہیم یونائیٹڈ کے کھلاڑی جیروڈ بووین نے میچ کے ۹۰؍ویں منٹ میں گول کر کے اپنی ٹیم کو فتح دلادی۔واضح رہے کہ پہلا ہاف  بغیر کسی گول کے برابری پر ختم ہوا تھا۔
  دوسرے ہاف میں سید بینراما نے ۶۲؍ویں منٹ میں پنالٹی کک کو گول میں تبدیل کرتے ہوئےویسٹ ہیم کو ایک گول کی برتری دلا دی تھی۔اس کے ۵؍ منٹ بعد ہی فیورینٹینا کے گیاکومو بوناوینٹورا نے میچ کے ۶۷؍ویں منٹ میں گول کرکے اسکور ایک ایک سے برابر کر دیا۔ایسا لگ رہا تھا کہ میچ اضافی وقت میں جا رہا ہے لیکن ۹۰؍ویں منٹ میں جیروڈ بووین  نے گول کرتے ہوئے اپنی ٹیم کی فتح کو یقینی بنا دیا۔
 کانفرنس لیگ خطاب جیتنے کے بعدویسٹ ہیم یونائیٹڈ کی آفیشل ویب سائٹ پر منیجر ڈیوڈ موئیس نے کہا’’یہ شاندار ہے، فٹ بال میں میرا طویل کریئر رہا ہے اور آپ کو اس طرح کے زیادہ لمحات نہیں ملتے لیکن شکر ہے کہ آج رات ہمیں وہ نتیجہ ملا جو ہم چاہتے تھے۔ہمارے کھلاڑیوں نے شاندار کھیل کا مظاہرہ کیا اور ٹرافی حاصل کرنے کیلئے سخت محنت کی۔مجھے اپنے کھلاڑیوں پر فخر ہے۔میدان پر انہیں ہی کھیلنا ہوتا ہے۔