گلوکار ابھیجیت بھٹاچاریہ نے کنگ خان شاہ رخ پر پھر طنز کیا کہ اگر سبھی نغمے ان کے نام پر چل رہے ہیں تو پھر مَیں کیا ہوں؟

۱۹۹۰ء اور ۲۰۰۰ء کی دہائی کے اوائل میں شاہ رخ خان کی آواز کے طور پر مشہور گلوکار ابھیجیت بھٹاچاریہ نے اپنے اور بالی ووڈ سپر اسٹار کے درمیان مبینہ طور پر کشیدہ تعلقات کے بارے میں ایک بار پھر بات چیت کی۔ شاہ رخ کے کچھ یادگار نغموں کو اپنی آواز دینے والے ابھیجیت گزشتہ کچھ برسوں سے اداکار پر مسلسل تنقید کررہے ہیں۔ اے این آئی کے ساتھ ایک حالیہ انٹرویو میں ابھیجیت نے طنز کیا کہ ’’ہم (شاہ رخ اور ابھیجیت) جڑواں بچوں کی طرح ہیں۔ آواز سے ہم ایک سے لگتے ہیں۔ لیکن اب مجھے احساس ہورہا ہے کہ مَیں نے ان کیلئے جو گیت گائے، وہ میرے نہیں ہیں۔ سب انہیں شاہ رخ کا گانا کہتے ہیں۔ یوں سمجھئے جیسے شاہ رخ ہی نے گانا بھی لکھا، شاہ رخ ہی نے موسیقی دی، شاہ رخ ہی نے فلم بنائی، شاہ رخ ہی سینماٹوگرافر ہیں، سب کچھ شاہ رخ کا ہے، ایسے میں مَیں کیا ہوں؟ اگر سب کچھ اسی کا ہے تو میرا کیا ہے؟‘‘ 

یہ بھی پڑھئے: ’’سکندر‘‘ نے باکس آفس پر ۱۰۰؍ کروڑ روپے کا ہندسہ پار کرلیا

خیال رہے کہ ابھیجیت نے شاہ رخ کیلئے چند یادگار نغمے گائے ہیں جن میں ’’ذرا سا جھوم لوں میں‘‘ (دل والے دلہنیا لے جائیں گے)، ’’بادشاہ او بادشاہ‘‘ (بادشاہ)، ’’توبہ تمہارے یہ اشارے‘‘ (چلتے چلتے) وغیرہ قابل ذکر ہیں۔ گلوکار کے تبصرے اور طنز اس جانب اشارہ کرتے ہیں کہ وہ یادگار نغمے گاکر بھی اپنی شناخت نہیں بناپائے ہیں بلکہ ان کی زندگی کا ایک بڑا حصہ شاہ رخ کے سائے میں رہ گیا ہے۔