اس سیریز کی کہانی مہاراشٹر کے ضلع تھانے کی ۵ عام خواتین کے گرد گھومتی ہے جو `ڈبہ` (ٹفن) ڈلیوری سروس کے ذریعے منشیات کا کاروبار شروع کرتی ہیں۔

فلمساز فرحان اختر اور شیبانی ڈانڈیکر، نیٹ فلکس کی ایک نئی سیریز "ڈبہ کارٹیل" پر کام کر رہے ہیں۔ ہتیش بھاٹیہ کی ہدایت کاری میں بنی اس سیریز کی کہانی مہاراشٹر کے ضلع تھانے کی ۵ عام خواتین کے گرد گھومتی ہے جو `ڈبہ` (ٹفن) ڈلیوری سروس کے ذریعے منشیات کا کاروبار شروع کرتی ہیں۔ سیریز کا پہلا لک گزشتہ سال جاری کیا گیا تھا۔ اس سیریز میں شبانہ اعظمی، جیوتیکا، فرحان اختر، نمیشا سجین، انجلی آنند، گجراج راؤ، سائی تمہنکر، للت دوبے اور جشو سینگپتا نے مرکزی کردار ادا کیا ہے۔ "ڈبہ کارٹیل" سیریز کا ٹیزر ۳۱ جنوری کو ریلیز کیا گیا۔ جمعہ کو جاری کئے گئے ٹیزر میں ٹفن خدمات فراہم کرنے والج عام خواتین کی زندگی اس وقت بدل جاتی ہے جب وہ منشیات کے کارٹیل میں ملوث ہو جاتی ہیں۔ ٹیزر کے آخر میں، جیوتیکا، شبانہ سے کہتی ہیں، "تو یہ ہے تمہارا نارکوس تھانے؟"

یہ بھی پڑھئے: پریش راؤل نے شاہ رخ خان کی فلموں کا دفاع کیا، انہیں گھٹیا کہنے والوں پر تنقید

شیبانی ڈانڈیکر نے سیریز کے متعلق گفتگو کرتے ہوئے بتایا، "دلچسپ بات یہ ہے کہ جب آپ کو ایک چھوٹا سا خیال آتا ہے اور آپ مصنفین کے ساتھ بیٹھتے ہیں، اور ایکسل انٹرٹینمنٹ، نیٹ فلکس، اور ہتیش بھاٹیہ کے ساتھ کام کرتے ہیں، تو وہ خیال ایک بڑے پروجیکٹ میں تبدیل ہو جاتا ہے۔" انہوں نے مزید کہا کہ یہ ایک ناقابل یقین حد تک حقیقی تجربہ رہا ہے۔ میں ایک تخلیق کار کے طور پر اس سے زیادہ کچھ نہیں مانگ سکتی تھی۔ اپنے شوہر (فرحان اختر) کے ساتھ کام کرنا اور پروڈیوسرز، عباس، قاسم اور ہتیش کے ساتھ کام کرنا، ایک شاندار تجربہ تھا۔ میں ایک تخلیق کار کے طور پر مزید کچھ نہیں مانگ سکتی تھی کیونکہ میں اپنے شوہر کے ساتھ کام کر رہی ہوں۔"

فرحان اختر نے کہا کہ "یہ ایک دلچسپ شو ہے اور کافی خاص بھی کیونکہ اس شو کی خالق شیبانی ہیں۔ یہی وجہ ہے کہ اس سیریز کو میرے دل میں ایک خاص جگہ حاصل ہے۔"

یہ بھی پڑھئے: ۳۰؍ جنوری ۲۰۲۵ءکو نیٹ فلکس پر ریلیز کے بعد پشپا ۲؍ نمبر ون پر ٹرینڈ کر رہی ہے

`ڈبہ کارٹیل` ۲۸ فروری کو او ٹی ٹی پلیٹ فارم نیٹ فلکس پر ریلیز ہوگی۔