جے دیپ اہلاوت کے والد دیانند اہلاوت کا انتقال ہوگیا ہے۔اہل خانہ نے اس مشکل وقت میں پرائیویسی کا خیال رکھنے کی اپیل کی ہے۔پاتال لوک کے اداکار کے والد کی عمر اور موت کی وجہ نہیں بتائی گئی ہے۔

جے دیپ اہلاوت کے ترجمان نے منگل کو کہا ہے کہ ’’جے دیپ اہلاوت کے والد دیانند اہلاوت کا آج انتقال ہوگیا ہے۔‘‘ یاد رہے کہ یہ خبر تب سامنے آئی ہے جب جے دیپ اہلاوت کی اداکاری سے مزین سیریز ’’پاتال لوک‘‘ کا سیزن ۲؍آنے والاہے جس میں جے دیپ اہلاوت انسپکٹر ہاتھی رام چودھری کے کردار میں نظر آئیں گے۔ ترجمان نے مزید کہاکہ ’’جے دیپ کےوالد کا ممبئی میں پیر کی رات انتقال ہوگیا تھا۔‘‘ جے دیپ اہلاوت کے ترجمان نے مزید کہا کہ ’’ہم جے دیپ اہلاوت کے والد دیانند اہلاوت کے انتقال سے غمزدہ ہیں۔ اہل خانہ کی محبت کے ساتھ وہ اپنے آخری سفر پر نکل چکے ہیں۔‘‘ 

یہ بھی پڑھئے: یوم وِلادت (۱۴؍ جنوری) پر خراج عقیدت: کیفیؔ کی شاعری کا آغاز بچپن ہی میں ہوگیا تھا

ترجمان نے اپنے بیان میں مزید کہا ہے کہ ’’جے دیپ اہلاوت اور ان کے اہل خانہ ان مشکل حالات میں پرائیویسی کی امید رکھتے ہیں کیونکہ وہ اپنے خاندان کے ایک اہم رکن کو کھونے کے غم کا سامنا کر رہے ہیں۔ ہم آپ کی دعاؤں کیلئے آپ کے شکرگزار ہیں۔‘‘جے دیپ اہلاوت کے والد کی موت کی وجہ اور ان کی عمر کی تفصیلات فراہم نہیں کی گئی ہیں۔