کترینہ کیف نے اپنے صحتمند بالوں کے بارے میں کہا کہ ان کی ساس مختلف اجزاء ملا کر ایک منفرد تیل تیار کرتی ہیں جو کافی طاقتور ہے۔

بالی ووڈ کی پسندیدہ جوڑیوں میں سے ایک کترینہ کیف اور وکی کوشل کی جوڑی اپنے دلکش بندھن کے ساتھ مداحوں کے دلوں پر راج کررہی ہے۔ حال ہی میں کترینہ کیف نے اپنے خوبصورت اور صحتمند بالوں کا راز بتایا ہے۔ انہوں نے انکشاف کیا کہ کس طرح ان کی ساس منفرد اجزاء ملا کر ان کیلئے ایک خاص تیل بناتی ہیں۔ انہوں نے اپنی ساس کے ہیئر آئل کے خفیہ نسخے کے بارے میں بتایا کہ ’’میری ساس یہ ہیئر آئل پیاز، آملہ، اوا کاڈو اور دو تین دیگر اجزاء ملا کر بناتی ہیں۔ یہ بالوں کی صحت کا گھریلو علاج ہے اور ناقابل یقین حد تک طاقتور ہے۔‘‘ 

یہ بھی پڑھئے: مقبوضہ مغربی کنارے میں غیر قانونی اسرائیلی آباد کاروں نے مسجد کو نذر آتش کر دیا

کترینہ نے زندگی کے اتار چڑھاؤ کے بارے میں بھی بات چیت کی۔ انہوں نے کہا کہ اگرچہ بہت سی چیزیں سطح پر بہترین دکھائی دیتی ہیں مگر ہر کوئی اپنی لڑائی لڑتا رہتا ہے۔ مشکل وقت کے دوران ایسا محسوس ہوتا ہے کہ آپ ڈوب رہے ہیں جبکہ دوسرے ترقی کر رہے ہیں، لیکن یہ یاد رکھنا ضروری ہے کہ زندگی اتار چڑھاؤ سے بھری ہوئی ہے۔ انہوں نے اپنے مداحوں کی حوصلہ افزائی کی کہ وہ لڑتے رہیں اور چیلنجوں کا سامنا کریں اور خود کو اور دوسروں کو ثابت قدم رہنے کی ترغیب دیں۔
کام کے محاذ پر کترینہ کیف آخری بار ’’میری کرسمس‘‘ میں نظر آئی تھیں جو ۱۲؍ جنوری ۲۰۲۴ء کو ریلیز ہوئی تھی۔ اب وہ عالیہ بھٹ اور پرینکا چوپڑہ کے ساتھ روڈ ٹرپ فلم ’’جی لے ذرا‘‘ میں کام کریں گی۔ تاہم، اس فلم کی شوٹنگ کی خبروں کے متعلق مداح بے صبری سے انتظار کررہے ہیں۔