کارتک آرین اب ’’پتی، پتنی اور وہ ۲‘‘ کی تیاری کررہے ہیں جس میں ان کے ساتھ بھومی پیڈنیکر نظر آئیں گی۔ ذرائع کے مطابق فلم کا تیسرا مرکزی کردار روینہ ٹنڈن کو آفر کیا گیا ہے۔

’’بھول بھلیاں۳‘‘ کی شاندار کامیابی کے بعد کارتک آرین اب اپنی ایک اور فرنچائز ’’پتی پتنی اور وہ‘‘ کے سیکویل کی تیاری کررہے ہیں۔ ۲۰۱۹ء میں ریلیز ہوئی ’’پتی پتنی اور وہ‘‘ اسی نام کی ۱۹۷۸ء کی فلم کا ریمیک تھی جس میں سنجیو کمار، ودیا سنہا اور رنجیت کور نے مرکزی کردار ادا کئے تھے۔ ۱۹۷۸ء کی فلم کی ہدایتکاری کے فرائض بی آر چوپڑا نے انجام دیئے تھے جبکہ ۲۰۱۹ء والی فلم کے ہدایتکار مدثر عزیز تھے جس میں کارتک آرین، بھومی پیڈنیکر اور اننیا پانڈے نے اداکاری کی تھی۔ اس فلم نے ہندوستانی باکس آفس پر ۸۹ء۸۶؍ کروڑ عالمی باکس آفس پر ۷۰ء۱۱۷؍ کروڑ روپے کی کمائی کی تھی۔ 

یہ بھی پڑھئے: سلمان خان، کرشمہ کپور اور سشمیتا سین کی ’بیوی نمبروَن‘ کی ۲۹؍ نومبر کو ری ریلیز

اب، چھ سال بعد، اس کے سیکویل میں کارتک آرین اور بھومی پیڈنیکر مرکزی کردار ادا کررہے ہیں۔ ایک نئی رپورٹ میں دعویٰ کیا گیا ہے کہ اس فلم میں روینہ ٹنڈن کو تیسرے مرکزی کردار کے طور پر کاسٹ کرنے کا منصوبہ بنایا جارہا ہے۔ ذرائع نے بالی ووڈ ہنگامہ کو بتایا کہ ’’روینہ ٹنڈن ’’پتی پتنی اور وہ ۲‘‘ کیلئے مدثر عزیز کے ساتھ بات چیت کر رہی ہیں۔ اور وہ یہ فلم سائن کرنے کیلئے پرجوش ہیں۔ ‘‘ ذرائع نے مزید کہا کہ ’’یہ روینہ کا کردار ہے جو فلم کے ہیرو کارتک آرین کی زندگی میں الجھن کا باعث بنتا ہے۔ جنوری ۲۰۲۵ء تک اس فلم کی مزید تفصیلات منظر عام پر آئیں گی۔ اس فلم کے علاوہ، کارتک جلد ہی ایک رومانوی میوزیکل کی شوٹنگ بھی شروع کریں گے جس کی ہدایتکاری انوراگ باسو کریں گے۔