وکاس کھنہ نے گوری خان کے ریستوراں `ٹوری کے خلاف جعلی پنیر کے دعووں کا دفاع کیا، مواد تخلیق کار کو `غلط معلومات پھیلانے پر تنقید کا نشانہ بنایا۔

مشہور شیف وکاس کھنہ نے شاہ رخ خان کی اہلیہ گوری خان کے ریستوراں’’ `ٹوری‘‘ کی حمایت کی ہے، بعد ازاں ایک مواد تخلیق کار نے دعویٰ کیا تھا کہ ریستوراں میں جعلی پنیر پیش کیا جا رہا ہے۔ وکاس نے اپنے انسٹاگرام اکاؤنٹ پر ٹوری کے حق میں ایک اسٹوری شیئر کی اور مواد تخلیق کار پر غلط معلومات پھیلانے کا الزام لگایا۔ انہوں نے یہ بھی وضاحت کی کہ ٹوری میں پیش کیے جانے والے پنیر میں ایسا ردعمل کیوں ظاہرہوا۔۱۸؍ اپریل کو وکاس کھنہ نے گوری کے ریستوراں کے دفاع میں ایک اسٹوری شیئر کرتے ہوئے لکھاکہ ’’میں کئی دہائیوں سے کھانا پکانے اور خوراک کی سائنس کے ساتھ کام کر رہا ہوں۔ میں نے کبھی اس قسم کی خطرناک غلط معلومات نہیں دیکھی، جیسا کہ اس یوٹیوبر نے پیش کی ہے جو خود کو فوڈ سائنسدان بتاتا ہے۔‘‘

یہ بھی پڑھئے: درگاہ اجمیر شریف کے خلاف ہندو سینا کا مقدمہ فوراً خارج کیا جائے : مرکزی حکومت

انہوں نے مزید کہاکہ ’’ آئیوڈین کا رنگ کچھ اجزاء جیسے آلو، چاول، روٹی، کارن اسٹارچ، آٹا اور کچے کیلے کی موجودگی میں ردعمل کے طور پر بدل جاتا ہے۔ یہ ردعمل کراس کنٹیمینیشن (اجزاء کی آپس میں ملاوٹ) کی وجہ سے بھی ہو سکتا ہے۔ یہ خوفناک ہے کہ غیر معیاری لوگوں کو سنجیدگی سے لیا جاتا ہے۔‘‘ انہوں نے اپنی پوسٹ میں نہ صرف ٹوری ریستوراں کو ٹیگ کیا بلکہ یوٹیوبر سارتھک سچدیوا کو بھی نشانہ بنایا۔  
جب یوٹیوبر کا یہ ویڈیو وائرل ہوا جس میں دعویٰ کیا گیا تھا کہ شاہ رخ خان اور گوری خان کے ریستوراں میں جعلی پنیر پیش کیا جا رہا ہے، تو’’ ٹوری ‘‘نے اپنے ہینڈل سے وضاحت جاری کی۔ انہوں نے کہا کہ ڈش میں سویا پر مبنی اجزاء شامل تھے، جس میں قدرتی طور پر اسٹارچ موجود ہوتا ہےاس لیے آئیوڈین ٹیسٹ میں یہ ردعمل سامنے آیا۔ان کا کہنا تھاکہ ’’آئیوڈین ٹیسٹ صرف اسٹارچ کی موجودگی کو ظاہر کرتا ہے، نہ کہ پنیر کی اصلیت کو۔ چونکہ ہماری ڈش میں سویا پر مبنی اجزاء شامل ہیں، اس لیے یہ ردعمل متوقع تھا۔ ہم ٹوری میں استعمال ہونے والے پنیر اور دیگر اجزاء کی خالص ہونے اور معیار کی ضمانت دیتے ہیں۔‘‘ 

یہ بھی پڑھئےؒؔ: ہندی اور مراٹھی کی مخالفت برداشت نہیں کی جائے گی،فرنویس کا انتباہ

آئیوڈین ٹیسٹ کیا ہے؟  
آئیوڈین ٹیسٹ ایک سادہ کیمیائی ٹیسٹ ہے جو پنیر میں اسٹارچ کی موجودگی کا پتہ لگاتا ہے۔ خالص اور ملاوٹ سے پاک پنیر میں اسٹارچ نہیں ہوتا۔ جب آئیوڈین کا محلول اسٹارچ کے ساتھ ملتا ہے، تو یہ نیلا-سیاہ ہو جاتا ہے۔ لہٰذا، اگر پنیر میں اسٹارچ موجود ہو تو اس کا رنگ بدل جائے گا۔ دوسری طرف، اگر پنیر خالص ہو تو آئیوڈین کا کوئی ردعمل نہیں ہوگا، کیونکہ خالص پنیر میں اسٹارچ نہیں ہوتا۔  
 ٹوری ریستوراں کے بارے میں
گوری خان نے فروری ۲۰۲۴ءمیں ٹوری ریستوراں کا افتتاح کیا۔ یہ پالی ہل، باندرا میں واقع ایک ۸۲؍سیٹر پین ایشیائی ریستوراں ہے۔ ممبئی کے کھانے کے منظرنامے میں تنوع کے باوجود، ٹوری کا مقصد ہندوستان میں ایک اعلیٰ ترین ڈائننگ ڈیسٹینیشن بننا ہے جو عالمی سطح کے بہترین ریستوراں سے مقابلہ کر سکے۔