گزشتہ سال مئی میں، سینٹرل ڈرگس اسٹینڈرڈ کنٹرول آرگنائزیشن ایڈوائزری بورڈ نے ایک ذیلی کمیٹی تشکیل دی تھی تاکہ ادویات سے جڑے قوانین میں ترمیم سے متعلق امور کا جائزہ لیا جائے اور ادویات کو او ٹی سی قرار دینے کیلئے ضروری دفعات شامل کی جائیں۔ اب اس پینل نے اپنی رپورٹ جمع کر دی ہے۔

ملک میں جلد ہی لیووسیٹریزین، ایبوپروفین اور پیراسٹامول سمیت ۲۷ ایسی ادویات، جو فی الحال صرف طبی نسخے کے ساتھ ملتی ہیں، میڈیکل اور عام دکانوں پر بغیر نسخے کے (اوور دی کاؤنٹر یا او ٹی سی) طرز سے فروخت کی جا سکیں گی۔ وزارت صحت و خاندانی بہبود کے ایک سینئر عہدیدار نے، جو اس پیش رفت سے واقف ہیں، نیوز۱۸ کو بتایا، "ذیلی کمیٹی نے غور و خوض کے بعد تقریباً ۲۷ عمومی فارمولیشنز کی فہرست پر مشتمل رپورٹ جمع کر دی ہے، جو اعلیٰ علاج کے شعبوں سے تعلق رکھتی ہیں۔ یہ فارمولیشنز سب سے زیادہ فروخت ہونے والی اور اپنی کیٹیگری میں بہترین حفاظتی پروفائل رکھتی ہیں۔ مثال کے طور پر، لیووسیٹریزین الرجی کے علاج کیلئے، ایبوپروفین درد کش ادویات میں بہترین اور پیراسٹامول بخار کم کرنے کیلئے موزوں ہے۔"  

سب پینل نے ان ادویات کی طاقت (ڈوز) کا بھی ذکر کیا جو او ٹی سی کیٹیگری میں دستیاب ہونی چاہئے۔ عہدیدار نے بتایا، "اگر لوگ ایبوپروفین جیسی درد کش دوا کو زیادہ مقدار میں لینے لگیں تو یہ نقصان دہ ہو سکتا ہے۔ اس لئے ضروری ہے کہ بغیر نسخے کے صرف معتدل یا ہلکی خوراک دستیاب ہو۔" ان ۲۷ ادویات کی فہرست میں عمومی فارمولیشنز کے نام اور بغیر نسخے کے فروخت کی اجازت دینے والی خوراک کی طاقت شامل ہے۔

یہ بھی پڑھئے: امرواتی کے کئی دیہات پانی کی قلت کا شکار، ٹینکروں سے فراہم پانی ناکافی

فی الحال، ہندوستان میں او ٹی سی ادویات کی تقسیم، مارکیٹنگ اور استعمال سے متعلق جامع ضابطوں کا فقدان ہے۔ گزشتہ سال مئی میں، سینٹرل ڈرگس اسٹینڈرڈ کنٹرول آرگنائزیشن (سی ڈی ایس سی او) نے ڈرگس ٹیکنیکل ایڈوائزری بورڈ (ڈی ٹی اے بی) کی سفارش کی روشنی میں ایک ذیلی کمیٹی تشکیل دی تھی تاکہ ادویات سے جڑے قوانین میں ترمیم سے متعلق امور کا جائزہ لیا جائے اور ادویات کو او ٹی سی قرار دینے کیلئے ضروری دفعات شامل کی جائیں۔ اس پینل نے اپنی رپورٹ جمع کر دی ہے اور ڈی ٹی اے بی اس پر غور کرے گا۔

ذیلی کمیٹی کی سفارشات

نیوز۱۸ کے دیکھے گئے ایک سرکاری دستاویز کے مطابق، آٹھ رکنی ذیلی کمیٹی نے تجویز پیش کی ہے کہ حکومت کو او ٹی سی ادویات کیلئے قانونی دفعات تیار کرنے، ادویات کو او ٹی سی قرار دینے کی اہلیت اور نسخے کی ادویات کی طرح خصوصی لیبلنگ کے تقاضوں کو متعین کرنے کی ضرورت ہے۔ دستاویز میں کہا گیا، "ڈرگس رولز، ۱۹۴۵ کے تحت درخواست جمع کرانے کے طریقہ کار، او ٹی سی کے طور پر ادویات کے انتخاب کے تقاضوں، لیبلنگ کے تقاضوں وغیرہ سے متعلق قانونی دفعات کو نافذ کیا جائے اور رپورٹ کے سیکشن ۷ کے تحت بیان کردہ ایک الگ شیڈول کا اضافہ کیا جائے۔" ذیلی کمیٹی کی سربراہی لیڈی ہارڈنگ میڈیکل کالج، دہلی کے ڈائریکٹر اور پروفیسر آف میڈیسن ڈاکٹر انوپم پرکاش کر رہے تھے۔ پینل کے دیگر اراکین میں ڈائریکٹر جنرل آف ہیلتھ سروسیز (ڈی جی ایچ ایس) سے ڈاکٹر امیش ڈی سورنگی، وردھمان مہاویر میڈیکل کالج اینڈ صفدرجنگ ہسپتال سے پیڈیاٹریشن ڈاکٹر رتن کمار گپتا اور پوسٹ گریجویٹ انسٹی ٹیوٹ آف میڈیکل ایجوکیشن اینڈ ریسرچ (پی جی آئی ایم ای آر) کے شعبہ فارماکولوجی سے ڈاکٹر بکاش میدھی شامل ہیں۔

یہ بھی پڑھئے: پہلگام دہشت گرد حملہ: حکومت کے حکم پر ہوائی کمپنیوں نے سری نگر کا کرایہ کم کیا

ڈی ٹی اے بی کا اجلاس اپریل میں متوقع ہے۔ تاہم، حتمی فیصلہ کئی اجلاسوں کے بعد ہو سکتا ہے کیونکہ مرکزی حکومت کو نسخے کی ادویات کو او ٹی سی کیٹیگری میں منتقل کرنے سے پہلے ایک جامع منصوبہ تیار کرنے کی ضرورت ہے۔