منی لانڈرنگ معاملہ میں کہا کہ ای ڈی جھوٹ بول رہی ہے، انسولین لینے کے مطالبہ پر سماعت کے بعد عدالت نے فیصلہ پیر تک محفوظ کرلیا۔

شراب پالیسی سے متعلق منی لانڈرنگ معاملہ میں جیل میں قید وزیر اعلیٰ اروند کیجریوال کو جیل کے اندر انسولین دینے کے مطالبہ پر جمعہ کو سماعت کی گئی۔ عدالت نے کیجریوال کی عرضی پر فیصلہ پیر تک محفوظ رکھ لیا۔خصوصی جج کاویری باویجا نے دونوں فریقوں کے دلائل سننے کے بعد کہا کہ وہ ۲۲؍ اپریل کو   اپنا فیصلہ سنائیں گی۔ تاہم اس دوران انہوں نے تہاڑ جیل اور ای ڈی سے  اس معاملے میں تفصیلی رپورٹ پیش کرنے کو کہا۔ 

یہ بھی پڑھئے: پہلے مرحلے کی ۱۰۲؍ سیٹوں پر ۶۰؍ فیصد پولنگ

قبل ازیں کیجریوال کے وکیل ابھیشیک منو سنگھوی نے عدالت کو بتایا کہ کیجریوال کی نئی درخواست کی ایک کاپی ای ڈی کو فراہم کر دی گئی ہے۔سنگھوی نے دلیل دی کہ ان کے مؤکل ۲۲؍ سال سے ذیابیطس کا شکار ہیں، جس کیلئے انہیں روزانہ انسولین کی ضرورت ہوتی ہے۔ انہوں نے کہا کہ میرا موکل بار بار کہہ رہا ہے کہ ان کا ڈاکٹر شوگر لیول مانیٹر کر سکتا ہے، اسے مسلسل مانیٹر کرنا چاہئے۔ سنگھوی نے کیجریوال کے چارٹ کا حوالہ دیا جس میں ان کی شوگر لیول کی نگرانی کی جا رہی ہے۔آم کھانے کے بارے میں ای ڈی کے دعوے پر سنگھوی نے کہا کہ کیجریوال کو صرف تین بار آم بھیجا گیا تھا۔ ۸؍ اپریل کے بعد تو آم نہیں بھیجے گئے۔کیجریوال نے چائے کے ساتھ چینی نہیں بلکہ شوگر فری کا استعمال کیا ہے  ای ڈی کے آلو پوری کھانے کے الزام پر سنگھوی نے کہا کہ یہ بالکل غلط الزام ہے۔گھر کا کھانا ۴۸؍ مرتبہ آیا جس میں صرف ایک بار کیجریوال نے آلو پوری کو نوراتری پرساد کے طور پر کھایا۔ انہوں نے درخواست کی کہ کیجریوال کو ڈاکٹر کی سہولت دی جائے۔