خواجہ اجمیریؒ کے عرس کے موقع پر درگاہ کے علاقے میں میونسپل کارپوریشن کی قبضہ مہم سے مقامی آبادی اور حکام کے درمیان احتجاج اور جھڑپیں ، حکام نے اس کارروائی کو زائرین کے لئے حفاظتی اقدام قرار دیا۔

اجمیر میونسپل کارپوریشن نے جمعرات کی صبح درگاہ کے علاقے میں ’’قبضہ مہم‘‘ کا آغاز کیا، جس کے تحت ۵۰؍ سے زائد دکانوں کو مسمار کیا گیا۔ یہ اقدام خواجہ معین الدین چشتیؒ کے ۸۱۳؍ ویں عرس کی تیاری کے سلسلے میں کیا گیا۔ غیر قانونی تعمیرات اور سڑک کے کنارے قبضوں کے خلاف اس کارروائی کے نتیجے میں مقامی آبادی اور حکام کے درمیان احتجاج، نعرے بازی اور جھڑپیں ہوئیں۔ ٹائمز آف انڈیا کے مطابق، دکانیں اہم سڑکوں تک تجاوز کر گئی تھیں نیز دکانداروں نے سڑکوں کے قریب نالیوں پر پلیٹ فارم بھی تعمیر کر لئے تھے۔ میونسپل کارپوریشن کے نمائندوں اور بڑی تعداد میں پولیس کی موجودگی کے ساتھ کئی بلڈوزر درگاہ کے علاقے میں داخل ہوئے۔ 

یہ بھی پڑھئے: سوڈان:عدم تحفظ، سیلاب اور ناقابل رسائی سڑکوں کے سبب طبی خدمات متاثر

غیر قانونی تعمیرات کو مسمار کرنے کا آغاز درگاہ کے قریب موجود بازار کی دکانوں اور عارضی عمارتوں سے ہوا۔ اطراف کے لوگ بلڈوزروں کی آواز سن کر نعرے بازی کرتے ہوئے اس علاقے کی طرف دوڑے اور مشینری کو روکنے کی کوشش کرتے رہے۔ نیز مظاہرین نے انسانی زنجیریں بھی بنائیں۔ میونسپل حکام نے اس کارروائی کا دفاع کرتے ہوئے کہا کہ ’’یہ غیر قانونی قبضے سڑکوں اور نالیوں کو بلاک کرتے ہیں، جس کی وجہ سے عرس کے دوران ہجوم کو مشکلات پیش آتی ہیں۔ سالانہ عرس میں عقیدتمندوں کی بڑی تعداد شرکت کرتی ہے۔ مسلسل تجاوزات نے نقل و حرکت کو مشکل بنا دیا ہے یہ اقدام زائرین کے لیے محفوظ اور آسان رسائی کو یقینی بنانے کے لیے کیا گیا ہے۔‘‘ واضح رہے کہ درگاہ کا علاقہ ایک سخت حفاظتی علاقہ بن گیا ہے۔ مزید احتجاج کو روکنے کے لیے اہم مقامات پر پولیس اہلکار تعینات ہیں۔