ڈیمو کریٹک پارٹی کی جانب سے صدارتی امیدوار کی حیثیت سے باضابطہ طور پر نامزدگی قبول کرتے ہوئے کملا ہیرس نے اپنے پیش رو تمام امریکی صدور کی طرح اسرائیل کے حق دفاع کی پر زور وکالت کی ، ساتھ ہی غزہ جنگ کے خاتمے اور یرغمالوں کی رہائی کا بھی مطالبہ کیا۔

امریکی نائب صدر کملا ہیرس نے باضابطہ طور پر ڈیموکریٹک پارٹی کی جانب سے صدارتی عہدے کیلئے اپنی نامزدگی کو قبول کر لیا ہےاس موقع پر انہوں نے غزہ جنگ ختم کرنے کی پر زور وکالت کی ۔ اپنی تقریر میں کملا ہیرس نے بیرونی اور خارجہ پالیسی میں بنیادی تبدیلی کی بات کہی لیکن وہ اسے کس طرح عمل میں لائیں گی اس پر کچھ نہیں کہا۔ فلسطینی نمائندوں کو اپنے کنوینشن میں بولنے کی اجازت نہ دینے کے سبب کئی دنوں کے احتجاج کے بعد کملا ہیرس نے اسرائیل کو محفوظ بنانے ، یرغمالو ں کو رہا کرنے اور غزہ جنگ کو ختم کرنے کااعادہ کیا۔ اپنے حامیوں کے درمیان انہوں نے کہا کہ ’’ اب وقت آگیا ہے کہ جنگ بند کی جائے اور یرغمالوں کو رہا کیا جائے۔‘‘

یہ بھی پڑھئے: پاکستان: ڈاکوؤں کے حملے میں بارہ سکیوریٹی اہلکار ہلاک، سات زخمی

انہوں نے کہا کہ ’’ میں ایک بات واضح کردوں کہ میں اسرائیل کے دفاع کے حق کے ساتھ ہوں ، اور ہمیشہ اس بات کو یقینی بنائوں گی کہ اسرائیل اپنا دفاع کر سکے۔‘‘اس کے علاوہ انہوں نے کہا کہ ’’ گزشتہ دس مہینوں سے غزہ میں کیا ہو رہا ہے،کئی معصوموں کو اپنی جان گنوانی پڑی،بھوک سے بد حواس افراد حفاظت کیلئے مارے مارے پھر رہے ہیں،تباہی اندوہناک ہے، میں اور جو بائیڈن اسرائیل کو محفوظ بنانے ، جنگ کو ختم کرنے اور یرغمالوں کو آزاد کرانے کیلئے اپنا کردار ادا کر رہے ہیں،غزہ کی تباہی ختم ہو تاکہ فلسطینی بھی آزادی، تحفظ، عزت نفس،اور خود ارادیت حاصل کر سکیں۔ ‘‘