ناگپورقومی شاہراہ پر ہونیوالے حادثے میں ایک مسافر ہلاک جبکہ۲۵؍ زخمی۔

امراوتی ناگپور قومی شاہراہ پر ناندگاؤں پیٹھ کے قریب ایک شیوشاہی بس پلٹ گئی ہے۔ جس میں ایک مسافر ہلاک اور ۲۸؍ مسافر زخمی ہو گئے ہیں۔ یہ حادثہ اتوار کی صبح تقریباً ۳۰:۹؍ بجے پیش آیا۔ بس ڈرائیور نے بتایا کہ راستہ پار کرنے والی ایک گائے کو بچانے کی کوشش میں وہ بس کا کنٹرول کھو بیٹھا اور بس الٹ گئی۔ حادثے میں زخمی مسافروں کو ضلع جنرل اسپتال میں علاج کے لئے داخل کیا گیا ہے۔ موصولہ تفصیلات کے مطابق شیو شاہی بس ناگپور سے اکولہ جا رہی تھی دوران سفر امراوتی ضلع کے ناندگاؤں پیٹھ کے قریب اچانک ایک گائے سڑک پر آ گئی۔ گائے کو بچانے کی کوشش میں بس ڈرائیور نے گاڑی پر قابو کھو دیا اور بس گائے سے ٹکرا کر سڑک کنارے الٹ گئی۔ اس حادثے میں ایک مسافر کی موقع پر ہی موت ہونے کی تصدیق ہوئی ہے۔ بس میں کل ۳۵؍افراد سوار تھے۔

یہ بھی پڑھئے: رونالڈو یوٹیوب چینل سے اربوں کمارہے ہیں!

اس حادثے میں زخمی ۲۸؍لوگوں کو ضلع جنرل اسپتال میں داخل کرایا گیا ہے۔ حادثے کے بعد علاقے کے مکینوں نے زخمیوں کو بس سے نکالنے اور انہیں اسپتال پہنچانے میں مدد کی۔ مسافروں کو ایمرجنسی دروازے سے باہر نکالا گیا۔ حادثے کی اطلاع ملتے ہی ناندگاؤں پیٹھ پولیس کی ٹیم موقع پر پہنچ گئی تھی۔ اس حادثے سے قومی شاہراہ پر ایک جانب کا ٹریفک کچھ دیر کے لیے روک دیا گیا تھا۔ شاہراہوں پر آوارہ جانوروں کا مسئلہ دن بہ دن سنگین ہوتا جا رہا ہے۔ ہائی وے پر سڑک کے بیچوں بیچ جانوروں کے بیٹھنے اور اچانک سڑک پر آنے سے حادثات کا خطرہ رہتا ہے۔ شہری اس مسئلہ پر عملی اقدام کا مطالبہ کررہے ہیں۔ ضلع میں حادثات کی بڑھتی ہوئی تعداد تشویشناک ہے اور پچھلے چھ سات مہینوں میں حادثات میں جان گنوانے والوں کی تعداد بھی تشویشناک ہے۔ گزشتہ چھ ماہ کے دوران ۱۴۶ ؍مہلک حادثات میں ۱۶۶؍افراد ہلاک ہوئے۔ جنوری سے جون تک ان چھ ماہ میں دیہی علاقوں میں کل ۲۸۵ ؍حادثات ہوئے ہیں، جن میں ۱۳۴ ؍افراد شدید زخمی ہوکر اپنے بازو، ٹانگ اور دیگر اعضاء گنوا چکے ہیں۔