ایک پریس ریلیز میں، وزارت دفاع نے کہا کہ چوٹی کا نام ۶ ویں دلائی لامہ کے نام پر رکھنا ان کی دانشمندی اور مونپا کمیونٹی کو خراج عقیدت پیش کیا ہے۔

ہندوستانی کوہ پیماوں نے اروناچل پردیش میں ایک نامعلوم چوٹی کو ۶ ویں دلائی لامہ سے منسوب کیا جس پر چین نے ناراضگی کا اظہار کیا ہے۔ اس خبر پر ردعمل ظاہر کرتے  ہوئے چین نے اروناچل پردیش پر اپنے دعوے کو دہرایا۔
گزشتہ دنوں، درانگ، اروناچل پردیش میں واقع نیشنل انسٹی ٹیوٹ آف ماؤنٹینیئرنگ اینڈ ایڈونچر اسپورٹس (این آئی ایم اے ایس) کے کوہ پیماؤں کی ایک ٹیم نے اروناچل پردیش میں واقع ۲۰ ہزار ۹۴۲ فٹ اونچی چوٹی کو کامیابی کے ساتھ سر کیا۔ کرنل رنویر سنگھ جموال کی قیادت میں ۱۵ رکنی ٹیم نے اس چوٹی کا نام ۶ ویں دلائی لامہ کے نام پر "تسانگ گیانگ گیاتسو چوٹی" رکھنے کا فیصلہ کیا۔ واضح رہے کہ ۶ ویں دلائی لامہ، تسانگ گیانگ گیاتسو ۱۶۸۲ء میں مون توانگ، اروناچل پردیش میں پیدا ہوئے تھے۔ 

یہ بھی پڑھئے:جنگ بندی کی درخواستیں بے اثر، اسرائیلی حملے مسلسل جاری

این آئی ایم اے ایس نے انڈین ماؤنٹینیرنگ فاؤنڈیشن (IMF) کو کامیاب چڑھائی اور چوٹی کا نام رکھنے کے فیصلے سے آگاہ کر دیا ہے۔ چوٹی کے نام کیلئے رسمی کارروائیاں مکمل کی جا رہی ہیں تاکہ "تسانگیانگ گیاتسو چوٹی" کو سرکاری نقشے پر تسلیم کیا جائے۔
ایک پریس ریلیز میں، وزارت دفاع نے کہا کہ چوٹی کا نام ۶ ویں دلائی لامہ کے نام پر رکھنا ان کی دانشمندی اور مونپا کمیونٹی کو خراج عقیدت پیش کیا ہے۔ واضح رہے کہ دیرنگ، اروناچل پردیش میں واقع این آئی ایم اے ایس، وزارت دفاع کے تحت قائم کیا گیا ایک ادارہ ہے۔
چینی وزارت خارجہ کے ترجمان لن جیان نے اس پر ردعمل دیتے ہوئے ایک میڈیا بریفنگ میں کہا کہ میں واضح طور پر کہنا چاہتا ہوں کہ زنگنان چینی علاقہ ہے اور اس سرزمین پر 
"نام نہاد" اروناچل پردیش قائم کرنا غیر قانونی ہے۔ یہ چین کا مستقل موقف رہا ہے۔ واضح رہے کہ چین، اروناچل پردیش کو زنگنان کہتا ہے۔
یاد رہے کہ چین، اپنے دعوے پر زور دینے کیلئے ۲۰۱۷ء سے اروناچل پردیش کے مقامات کے نام تبدیل کرتا ہے۔ ہندوستان نے اروناچل پردیش پر چین کے دعوے کو مسترد کرتے ہوئے کہا ہے کہ اروناچل پردیش ہندوستان کا اٹوٹ حصہ ہے اور اس کے مقامات کو "ایجاد شدہ" نام تفویض کرنے سے یہ حقیقت نہیں بدلے گی۔