مرکزی حکومت کے بجٹ پر اپنی رائے پیش کرتے ہوئے اسد الدین اویسی نے پارلیمنٹ میں اظہار خیال کیا۔ انہوں نے نرملا سیتا رمن کی جانب سے پیش کئے جانے والے مرکزی بجٹ میں مسلمانوں کو نظر انداز کرنے اور مودی حکومت پر مسلمانوں کو اچھوت بناکر پیش کرنے کا الزام لگایا۔

مرکزی بجٹ پر بات کرتے ہوئے آل انڈیا مجلس اتحاد المسلمین کے صدر اور حیدر آباد سے رکن پارلیمنٹ اسد الدین اویسی نے کہا کہ’’ ہندوستان میں مسلمانوں کے ساتھ امتیازی سلوک کیا جا رہا ہے۔ہندوستان میں سب سے بڑی اقلیت بے شک مسلمان ہیں۔ ‘‘انہوں نے سوالیہ نشان لگاتے ہوئے حکومت سے سوال کیا کہ ’’ کیا ۱۷؍ کروڑ مسلمانوں میں کوئی بھی غریب نہیں ہے، کوئی کسان نہیں ہے، کوئی نو جوان نہیں ہے ،کوئی خاتون نہیں ہے،؟ اس مادر وطن میں مسلمان غریب تر ین ہیں۔مسلم نوجوان بنا روزگار، بنا تعلیم حتی کہ حکومت کی جانب سےدی جارہی بنیادی امداد سے بھی محروم ہیں،انہیں کسی بھی قسم کی تربیت فراہم نہیں کی جا رہی۔ مودی حکومت نے انہیں اچھوت بنا کر پیش کیا ہے۔‘‘

یہ بھی پڑھئے : ’’کانگریس کوشعبہ اقلیت بندیاعمران پرتاب گڑھی کوصدارت سےمعزول کردیناچاہئے‘‘

اسد الدین اویسی نے بتایا کہ مسلمانوں کی سیاست میں کوئی نمائندگی نہیں ہے،اس کے علاوہ انہوں نے سرکاری اسکالرشپ میں تخفیف پر بھی سوال اٹھائے۔انہوں نے مطالبہ کیا کہ حکومت مطالبہ پر مبنی اسکیم کے تحت اقلیتوں کواسکالرشپ فراہم کرے۔ انہوں نے کہا کہ حج کمیٹی بدعنوانی کی نظیر بن کر رہ گئی ہے۔اور حکومت سی بی آئی کے ذریعے تفتیش کرے۔مسلمانوں کو وہ دیا جانا چاہئے جو وہ ہندوستان کے آئین کے مطابق مطالبہ کر رہے ہیں۔ اگر ۱۷؍ کروڑ مسلمانوں کو اعتماد میں نہیں لیا گیا تو ہندوستان ترقی کیسے کرے گا۔‘‘انہوں نےہنگرانڈیکس کا بھی معاملہ اٹھایا، ساتھ ہی یہ بھی طنز کیا کہ شاید وزیر مالیات بیروزگار ٹیکس بھی متعارف کرائیں۔انہوں نے کہا کہ صحت عامہ اور عوامی فلاح میں کوئی اضافہ نہیں ہوا ہے ، شاید مودی نے متوسط طبقہ کے وسائل کو اپنے اتحادیوں کیلئے محفوظ رکھا ہے۔اسد الدین اویسی نے کنڈو کمیٹی کا حوالہ بھی دیا جس میں بتایا گیا تھا کہ مسلم معاشرہ میں تعلیم ترک کرنے کا عمل پرائمری اسکول کے بعدشروع ہو جاتا ہے۔

क्या 17 करोड़ मुसलमानो से नफरत करके भारत एक विकसित देश बन सकता है?#AsaduddinOwaisi #Parliament #LokSabha #Indianmuslim pic.twitter.com/esrhkitrll

— Asaduddin Owaisi Unofficial (@_asadowaisi) July 29, 2024

اپنی تقریر کے آخر میں انہوں نےسیتا رمن کے پیش کردہ تفرقہ پر مبنی بجٹ پر تنقید کرنے کیلئے حبیب جالب کی نظم دستور کے اشعار بھی پڑھے،جو اکثر احتجاج اور مظاہروں میں پڑھے جاتے ہیں ، امتیازی سلوک پر مبنی اس بجٹ پر تنقید کرتے ہوئے آخر میں ان باتوں کےساتھ اپنی تقریر مکمل کی کہ’’میں بیروزگاری کے متعلق کچھ کہنا چاہتا ہوں جب ایک رکن نے کہا کہ ملازمت دی جا چکی ہے۔
پھول شاخوں پہ کھلنے لگےتم کہو۔جام رندوں کو ملنے لگے تم کہو۔چاک سینوں کےسلنے لگے تم کہو۔ اس کھلے جھوٹ کو ۔ذہن کی لوٹ کو ۔میں نہیں مانتا، میں نہیں جانتا۔‘‘