بابا رام دیو نے ’شربت جہاد‘ کی اصطلاح استعمال کرتے ہوئے ایک مشہور شربت ساز کمپنی پر مساجد و مدارس کو فنڈ دینے کا الزام لگایا، جس پر سوشل میڈیا پر زبردست تنازع کھڑا ہو گیا۔

یوگا گرو بابا رام دیو ایک بار پھر اپنے متنازع بیان کے باعث سرخیوں میں ہیں۔ اس بار وہ ’شربت جہاد‘ جیسے متنازع لفظ کے استعمال کے سبب نشانے پر آ گئے ہیں۔ دراصل، سوشل میڈیا پر وائرل ہونے والے ایک ویڈیو میں بابا رام دیو نے ایک مشہور شربت ساز کمپنی پر الزام لگایا کہ وہ اپنے منافع سے مساجد اور مدارس تعمیر کر رہی ہے۔ ویڈیو میں رام دیو لوگوں کو مشورہ دیتے ہیں کہ وہ بازار میں دستیاب شربتوں کے بجائےپتانجلی کا گلاب شربت خریدیں۔ ان کا کہنا ہے کہ اگر کوئی پتانجلی کا شربت خریدتا ہے، تو اس کا پیسہ ’گروکل‘، پتانجلی یونیورسٹی اور بھارتیہ شکشا بورڈ جیسے اداروں کو جاتا ہے۔ 

Sharbat Jihad? Lala Ramdev is now selling his low quality Patanjali Sharbat by playing the Hindu-Muslim Card. He knows that`s the only way to fool Indians. The same Ramdev sold his Patanjali products in the Middle East by obtaining Halal Certification for some of its products,… pic.twitter.com/R6sP3y5H86

— Mohammed Zubair (@zoo_bear) April 9, 2025

مذکورہ ویڈیو پتانجلی کے آفیشل فیس بک پیج پر شیئر کیا گیا ہے۔ اس کے ساتھ ایک تیز اور اشتعال انگیز کیپشن بھی لکھا گیا، جس میں کہا گیا: ’’شربت جہاد کے نام پر بیچے جا رہے ٹوائلٹ کلینر اور کولڈ ڈرنک کے زہر سے اپنے خاندان اور بچوں کو بچائیں۔ صرف پتانجلی کا شربت اور جوس ہی گھر میں لائیں۔ ‘‘ رام دیو نے اس ویڈیو میں سافٹ ڈرنکس کمپنیوں کو بھی نشانہ بنایا اور کہا کہ گرمی میں لوگ جو ٹھنڈے مشروبات پیتے ہیں، وہ دراصل ’ٹوائلٹ کلینر‘ جیسے زہریلے مشروب پی رہے ہیں۔ انہوں نے ان مشروبات کو صحت کیلئے خطرناک قرار دیتے ہوئے کہا کہ یہ دراصل عوام پر حملہ ہے۔ 

یہ بھی پڑھئے: یو پی آئی لین دین کے تعلق سے آر بی آئی کا اہم اعلان

اگرچہ رام دیو نے کسی کمپنی کا نام نہیں لیا لیکن ان کے بیان کو ’روح افزا‘ کے بالواسطہ حوالہ کے طور پر دیکھا جا رہا ہے، جو دہائیوں سے ہندوستان کے گھروں میں استعمال ہونے والا ایک معروف شربت ہے۔ ان بیانات کے بعد سوشل میڈیا پر زبردست ردعمل سامنے آیا۔ کئی صارفین نے رام دیو کو مذہبی جذبات بھڑکانے کا الزام دیا، تو کچھ نے پتانجلی کی مارکیٹنگ حکمت عملی پر سوال اٹھایا۔ ناقدین کا کہنا ہے کہ رام دیو کا یہ بیان ایک خاص برادری کو نشانہ بنانے اور فرقہ وارانہ ہم آہنگی کو نقصان پہنچانے کی کوشش ہے۔ بتا دیں  کہ یہ پہلا موقع نہیں جب بابا رام دیو تنازعات میں گھرے ہوں۔ حال ہی میں سپریم کورٹ نے ان سے گمراہ کن اشتہارات پر معافی مانگنے کو کہا تھا، جن میں یہ دعویٰ کیا گیا تھا کہ پتانجلی کے پروڈکٹس سنگین بیماریوں کا علاج کر سکتے ہیں۔