آن لائن ٹکٹنگ پلیٹ فارم’ ’بُک مائی شو‘‘ نے اسٹینڈ اپ کامیڈین کُنال کامرا کا تمام مواد اپنی ویب سائٹ سے ہٹا دیا اور انہیں فنکاروں کی فہرست سے خارج کر دیا ۔ اس سے قبل شیو سینا کے سوشل میڈیا سربراہ راہل کنال نے بدھ کو بک مائی شو کے سی ای او سے مطالبہ کیا تھا کہ وہ اس کامیڈین کو ویب سائٹ سے ہٹا دیں۔

آن لائن ٹکٹنگ پلیٹ فارم بک مائی شو نے اسٹینڈ اپ کامیڈین کنال کمرا کو اپنے پلیٹ فارم سے خارج کردیا ہے۔ پی ٹی آئی کے مطابق، یہ بات مہاراشٹر کے وزیر اعلی ایکناتھ شندے کی شیو سینا شاخ کے ایک لیڈر نے سنیچر کو بتائی۔ شیو سینا کے سوشل میڈیاسربراہ راہل کنال نے بک مائی شو کے سی ای او آشیش ہیم راجانی کا شکریہ ادا کیا کہ انہوں نے اپنا پورٹل صاف رکھا اور خالص تفریح کی فہرست سے ایسے آرٹسٹ کو باہر رکھا۔اس پیش رفت پر ایک رپورٹ کے جواب میں، کنال کمرا نے بک مائی شو سے پوچھا کہ کیا وہ اپنے شوزکو پلیٹ فارم پر لسٹ کر سکتے ہیں۔ کامیڈین نے مزید کہاکہ’’ اگر نہیں تو کوئی بات نہیں، میں سمجھتا ہوں۔‘‘
این آئی کے مطابق، بدھ کو کنال نے ہیم راجانی کو خط لکھا تھا جس میں انہیں کامرا کو پلیٹ فارم سے ہٹانے کی اپیل کی گئی تھی۔کنال کے خط میں کامرا کو ایک ایسا فرد قرار دیا گیا، جو وزیر اعظم نریندر مودی، وزرائے اعلی اور نائب وزرائے اعلی کے خلاف ’’توہین اور بدنام کرنے کی مسلسل مہم‘‘ چلاتا ہے۔یہ اقدامات مزاح یا طنز سے کہیں آگے کی مجرمانہ سازش کا حصہ لگتے ہیں۔ تاہم بک مائی شو نے اب تک اس معاملے پر کوئی تبصرہ نہیں کیا ہے۔ 

یہ بھی پڑھئے: کیرالا:ایس این ڈی پی لیڈر ویلپلی نٹیسن کی مسلم اکثریتی ضلع کےتعلق سے نفرت انگیزی

واضح رہے کہ ۲۳؍ مارچ کو کنال کامرا نے سوشل میڈیا پلیٹ فارم یو ٹیوب پر ایک ویڈیو پوسٹ کیا تھا، جس میں انہوں نے ایک ہندی فلم کے گانے کی طرز پر بظاہر ایکناتھ شندے پر تنقید کرتے ہوئے لفظ غدار کا استعمال کیا تھا، ساتھ ہی ۲۰۲۲ء میں مہاراشٹر کے سابق وزیر اعلی ادھو ٹھاکرے کے خلاف بغاوت اور اس کے بعد کے سیاسی بحران کی طرف اشارہ کیا۔ تاہم، انہوں نے شندے کا نام نہیں لیا۔ کنال کامرا کے شو کی ویڈیو سوشل میڈیا پر وائرل ہو گئی، شندے سینا کے کارکنان نے ممبئی کے کھار میں واقع اسٹوڈیو کو تباہ کر دیا، جہاں یہ شو ریکارڈکیا گیا تھا۔جس کے بعد پولیس نے راہل سمیت شیو سینا کارکنان کے خلاف تخریب کاری کا مقدمہ درج کر لیا۔
اگلے دن ممبئی پولیس نے کامرا کے خلاف بھارتیہ نیائے سنہتا کے تحت توہین اور عوامی ایذا رسانی  کے الزامات کے تحت مقدمہ درج کیا۔ دی انڈین ایکسپریس کی رپورٹ کے مطابق، کامیڈین نے اس معاملے میں پولیس کے تین سمن نظر انداز کیے ہیں، جن میں سنیچر کو جاری کیا گیا ایک بھی شامل ہے۔ دریں اثناء۲۸؍ مارچ کو، مدراس ہائی کورٹ نے کامرا کو۷؍ اپریل تک پیشگی ضمانت دے دی۔ جسٹس سندر موہن نے کہا کہ وہ ابتدائی طور پر مطمئن ہیں کہ کامرا مہاراشٹر کی عدالتوں میں پیشگی ضمانت کیلئے نہیں جا سکیں گے۔