دہلی کے ہر اسمبلی حلقے میں عوام کو آئین کے تحفظ کے تئیں بیدار کیا جائے گا ،۲۶؍ نومبر کو دہلی کے تال کٹورا اسٹیڈیم میں اس مہم کا اختتام کیا جائے گا۔

کانگریس نے جمعہ سے قومی راجدھانی دہلی میں آئین بچاؤ مہم شروع کی ہے، جو دہلی کے ہر اسمبلی حلقے میں ۱۰۰؍دن تک جاری رہے گی اور پھر ۲۶؍نومبر کو تال کٹورا اسٹیڈیم میں اس مہم کا اختتام تقریب کے ساتھ کیا جائے گا۔ خیال ہے کہ لوک سبھا انتخابات میں کانگریس نے آئین کی حفاظت کا مسئلہ زور و شور سے اٹھایا تھا اور بی جے پی کے آئین مخالف عزائم کی نشان دہی کی تھی۔ یہی وجہ ہے کہ لوگوں نے کانگریس اور انڈیا اتحاد کو پسند کیا اور اس کی سیٹوں میں اضافہ ہوا۔ کانگریس اب اسمبلی انتخابات میں بھی اسی بیانیہ کو آگے بڑھائے گی۔ 

یہ بھی پڑھئے:کولکاتا میں ممتا بنرجی کا مارچ، حقائق کو چھپانے کا الزام عائد کیا

کانگریس کے ایس سی ڈپارٹمنٹ نے جمعہ کو دہلی میں آئین کی حفاظت کی مناسبت سے تقریب کا انعقاد کیا۔ خزانچی اجے ماکن نے جو پروگرام کی صدارت کر رہے تھے، کہا کہ کانگریس پارٹی۱۰۰؍ دنوں میں ملک بھر میں آئین بچاؤ مہم چلائے گی۔ ملک بھر میں ۳؍ لاکھ آئین کے محافظ بنائے گئے ہیں جبکہ دہلی کے ۷۰؍ اسمبلی حلقوں میں آئین کے محافظ بنائے جائیں گے۔ انہوں نے کہا کہ کانگریس نے انتخابی ریاستوں ہریانہ، جھارکھنڈ اور مہاراشٹر میں بھی آئین کے محافظوں کی تقرری شروع کر دی ہے۔ ہمارے تمام پڑوسی ممالک میں ہنگامہ آرائی ہے جنہوں نے ہمارے ساتھ آزادی حاصل کی لیکن ہمارے ملک میں ایسا نہیں ہے کیونکہ ہمارا آئین بہت مضبوط ہے۔ اس کی حفاظت کیلئے ہی یہ مہم شروع کی جارہی ہے۔