غزہ میں حماس کی مسلح ونگ القسام بریگیڈ نے امن معاہدے کے ثالثوں پر زور دیا ہے کہ وہ اسرائیل کو جنگ بندی کے معاہدے پر مجبور کریں، انہوں نے مزید کہا کہ تنظیم معاہدے کے تمام مراحل اور قیدیوں کے تبادلے کے معاہدے کے نظام الاوقات کی پابندی کرے گی۔

غزہ میں حماس کی مسلح ونگ القسام بریگیڈ نے کہا ہے کہ تنظیم غزہ میں نافذ ہونے والے جنگ بندی معاہدے کی پاسداری کرے گی لیکن اسرائیل کی کسی بھی ممکنہ خلاف ورزی سے اس عمل کو خطرہ لاحق ہو جائے گا اور یرغمالیوں کی زندگیاں خطرے میں پڑ جائیں گی۔اتوار کو ایک ویڈیو تقریر میں،القسام بریگیڈ کے ترجمان ابو عبیدہ نے ثالثوں پر زور دیا کہ وہ اسرائیل کو جنگ بندی کے معاہدے پر مجبور کریں، اور مزید کہا کہ گروپ معاہدے کے تمام مراحل اور قیدیوں کے تبادلے کے معاہدے کے ٹائم ٹیبل کی پابندی کرے گا۔

یہ بھی پڑھئے: حماس نے ۳؍ یرغمال خواتین اوراسرائیل نے ۹۰؍ فلسطینی یرغمالیوں کو رہا کیا

ابو عبیدہ نے کہا، ’’سب کچھ دشمن کے عزم پر منحصر ہے۔ قا بض اسرائیل کی جانب سے خلاف ورزیاں اس عمل کو خطرے میں ڈال دیں گی۔‘‘انہوں نے مزید کہا کہ ’’ہم اپنی عوام کی زندگیوں کے تحفظ اور اپنے مقاصد کے حصول کیلئے معاہدے کے تمام مراحل، اس کی تفصیلات اور اوقات پر عمل آوری کے خواہشمند ہیں، اور ہم ثالثوں سے اپیل کرتے ہیں کہ وہ دشمن کو اس کی پابندی کرنے پر مجبور کریں۔‘‘
اس سے قبل، حماس نے جنگ بندی معاہدے کے پہلے مرحلے کے حصے کے طور پر تین اسرائیلی خواتین یرغمالیوں کو رہا کیا تھا اور اس کے بدلے اسرائیل کی جانب سے اتوار کو ۹۰؍فلسطینی قیدیوں کو رہا کرنے کی توقع کی جا رہی تھی۔