غزہ جنگ کے پیش نظر فلسطین فٹ بال اسوسی ایشن نے فیفا سے اسرائیلی ٹیم کو فٹ بال سے معطل کرنے کی تجویز پیش کی ہے۔ تاہم، فیفا صدر جیانی انفینٹینو نے کہا ہے کہ اس معاملے میں ادارہ قانونی مشورہ حاصل کرے گا جس کی روشنی میں فیفا کونسل ۲۵؍ جولائی کو فیصلہ سنائے گی۔

فیفا (FIFA)فلسطین میں انسانی حقوق کی خلاف ورزیوں کی وجہ سے اسرائیل کو بین الاقوامی فٹ بال سے معطل کرنے کی فلسطینی تجویز پر فیصلہ کرنے کیلئے ۲۵؍ جولائی تک کونسل کے اجلاس کے انعقاد سے قبل آزاد قانونی مشورہ حاصل کرے گا۔ اس ضمن میں فیفا کے صدر جیانی انفینٹینونے جمعہ کو فیفا کانگریس میں اس منصوبے کا خاکہ پیش کیا جب فلسطینی اور اسرائیل کی فٹ بال فیڈریشنز کے نمائندوں کو بطور انجمن ۲۱۱؍ ممبران کے سامنے اپنی بات رکھنے کا موقع دیا گیا۔ 

یہ بھی پڑھئے: ممبئی بل بورڈ حادثہ: ہورڈنگ کا مالک بھاویش بھنڈے ادئے پور سے گرفتار

انفینٹینو نے کہا کہ فیفا تین درخواستوں (فلسطینی ایف اے کی طرف سے) کا تجزیہ کرنے اور فیفا کے قوانین کو درست طریقے سے لاگو کرنے کو یقینی بنانے کیلئے آزادانہ طور پر قانونی مشورہ لے گا۔ اس کے بعد نتائج اور سفارشات کو فیفا کونسل کو بھیج دیا جائے گا۔ انہوں نے کہا کہ ’’صورتحال کی عجلت کی وجہ سے، ایک ہنگامی فیفا کونسل بلائی جائے گی جو ۲۵؍ جولائی سے پہلے قانونی تشخیص کے نتائج کا جائزہ لینے اور مناسب فیصلے کرے گی۔ ‘‘

The FIFA Council has declined to bring Palestine`s proposal to ban Israel to a broader vote. Instead, they will initiate a legal assessment and convene before July 20 to "review" the proposal thoroughly. pic.twitter.com/5KMyQRogT7

— Quds News Network (@QudsNen) May 17, 2024

فلسطین فٹ بال اسوسی ایشن کی تجویز میں فلسطین میں اسرائیلی قبضے کے ذریعے بین الاقوامی قوانین کی خلاف ورزیوں، خاص طور پر غزہ میں، کا ذکر کیا گیا ہے اور انسانی حقوق اور امتیازی سلوک کے خلاف فیفا کے قانونی وعدوں کا حوالہ دیا گیا ہے۔ فلسطینی فٹ بال اسوسی ایشن نے لکھا ہے کہ غزہ میں فٹ بال کا تمام ڈھانچہ یا تو تباہ ہو چکا ہے، یا اسے شدید نقصان پہنچا ہے، جس میں الیرموک کا تاریخی سٹیڈیم بھی شامل ہے۔ اور یہ بھی کہا کہ اسے الجزائر، عراق، اردن، یمن اور شام فیڈریشنز کی جانب سے اس تحریک کی حمایت حاصل ہے۔