اسرائیل نے مشرقی غزہ کے التباعین اسکول پر بمباری کی ہے جس کے نتیجے میں سیکڑوں فلسطینی ہلاک جبکہ درجنوں زخمی ہوئے ہیں۔ اسرائیلی فوج نے یہ حملہ اس وقت کیا جب فلسطینی فجر کی نماز ادا کر رہے تھے۔ مقامی افراد کے مطابق اسکول پر تین میزائل گرائے گئے ہیں جس کے سبب عمارت ملبے میں تبدیل ہوگئی ہے۔

اسرائیل نے غزہ شہر کے ایک اسکول میں بمباری کی جہاں فلسطینی فجر کی نماز ادا کر رہے تھے۔ اسرائیل کی بمباری کے نتیجے میں سیکڑوں فلسطینی ہلاک جبکہ درجنوں زخمی ہوئے ہیں۔ اسرائیل فوج نے مشرقی غزہ شہر کے الدراج کے التباعین اسکول میں بمباری کی جس کے نتیجے میں بڑے پیمانے پر فلسطینی ہلاک ہوئے ہیں۔ غزہ کی خبر رساں ایجنسی وفا کے مطابق مقبوضہ فوج کے جنگی جہازوں نے اس وقت اسکول پر بمباری کی جب فلسطینی فجر کی نماز ادا کر رہے تھے۔ مقامی شہری دفاعی اہلکاروں نے کہا کہ اسرائیلی فوج نے اسکول پر تین میزائل گرائے تھے جس کے نتیجے میں اسکول کی عمارت ملبے میں تبدیل ہوگئی۔ مقامی افراد کا کہنا ہے کہ وہ اب تک متاثرین کو تلاش کررہے ہیں۔ 

یہ بھی پڑھئے: ۳۱؍اراکین پرمشتمل مشترکہ پارلیمانی کمیٹی تشکیل

خیال رہے کہ اسرائیلی جارحیت کے نتیجے میں اب تک ۴۰؍ ہزار سے زائد فلسطینی جاں بحق جبکہ ۹۲؍ ہزار سے زائد زخمی ہوئے ہیں جن میں زیادہ تعداد خواتین اور بچوں کی ہے۔ سیکڑوں فلسطینی اب بھی ملبے تلے دبے ہیں جبکہ اسرائیلی فوج نے ۱۰؍ ہزار سے زائد فلسطینیوں کا اغوا کیا ہے جبکہ ہزاروں کو حراست میں لیا ہے۔ اسرائیلی جارحیت کے نتیجے میں غزہ میں پانی، غذا، بجلی، ادویات اور بنیادی اشیاء کی شدید قلت ہے۔ محصور خطے میں گندگی اور سیویج کی وجہ سے سنگین بیماریاں پھیل رہی ہیں۔ 
اسرائیلی حملوں کے نتیجے میں غزہ کا ۶۰؍ سے زائد فیصد ڈھانچہ تباہ ہوگیا ہے۔ عمارتیں ملبے میں تبدیل ہوگئی ہیں جبکہ ایک ملین سے زائد فلسطینی بے گھر ہوئے ہیں جو مشکلات میں زندگی بسر کرنے پر مجبور ہیں۔