جارجیا میں موجودہ صدر سلوم زورابیشویلی نے اپنی مدت ختم ہونے پر استعفیٰ دینے سے انکار کرتے ہوئے نئے انتخابات کا مطالبہ کیا ہے۔گورننگ جارجیائی ڈریم پارٹی کے زیر کنٹرول پارلیمنٹ جلد ہی میخائل کا ویلاشویلی کے نام پر مہر ثبت کرے گی۔

جارجیا میں موجودہ صدر کے عہدہ صدارت کی مدت ختم ہونے کے بعد بھی استعفیٰ دینے سے انکار اور نئے انتخابات کامطالبہ کرنے کے بعد ملک میں سیاسی بحران پیدا ہو گیا ، اسی درمیان مغرب کے سخت ناقد میخائل کا ویلاشویلی نے بطور صدر حلف لیا۔اتوار کو تبلیسی میں کم ازکم ۲؍ ہزار یورپی یونین کے حامی مظاہرین جمع ہوئے۔میخائل کا ویلاشویلی کی تقرری نے جنوبی قفقاز کے ملک میں سیاسی بحران کو جنم دیا۔حکومت کے ذریعےیورپی یونین کی مذاکرات کی درخواست کو پس پشت ڈالنے کے فیصلے نے بڑے پیمانے پر احتجاج کو جنم دیا۔

یہ بھی پڑھئے: مغربی یورپ میں ’’’یوکرین کی فتح تک حمایت‘‘ کی تحریک دم توڑ گئی: سروے

جارجیا کی موجودہ یورپی یونین کی حامی صدر سلوم زورابیشویلی نے اعلان کیا کہ وہ ملک کی واحد آئینی صدر ہیں، اور عہدے سے ہٹنے سے انکار کر دیا، جبکہ ان کا دور صدارت اتوار کو میخائل کی متنازع تقرری کے ساتھ ہی ختم ہو رہا ہے۔لیکن انہوں نے کہا کہ وہ صدارتی محل خالی کر دیں گی۔انہوں نے ہزاروں یورپی یونین حامی مظاہرین سے کہا کہ’’میں صدارتی محل چھوڑ کر عوام کے ساتھ کھڑی ہوں، میرے ساتھ عوام ہے، اعتماد ہے اور ملک کا پرچم ہے۔‘‘کئی مہینوں سے جاری سیاسی بحران ایک غیر متوقع مراحل میں داخل ہونے جارہا ہے،ابھی یہ واضح نہیں کہ اگر موجودہ صدر نے صدارتی محل خالی نہ کیا تو کیا ہوگا۔گورننگ جارجیائی ڈریم پارٹی کے زیر کنٹرول پارلیمنٹ جلد ہی اپنے وفادار اورانتہائی دائیں بازو کے سابق فٹبالر میخائل کا ویلاشویلی کو منتخب کرے گی۔
میخائل کا ویلاشویلی کے انتخاب کے فوری بعد مظاہرین صدارتی محل کے باہر جمع ہو گئے۔ان میں سے بہت سے لوگوں نے یورپی یونین کا جھنڈا اٹھا رکھا تھا۔اور جارجیا کے نعرے لگا رہے تھے۔کئی لوگوں نے صدارتی محل کی ریلنگ کو پکڑ رکھا تھا۔زورابیشویلی اور مظاہرین نے جارجیائی ڈریم پارٹی پر اکتوبرکے پارلیمانی انتخابات میں دھاندلی کا الزام عائد کرتے ہوئے نئےانتخاب کا مطالبہ کیا۔ان کا کہنا ہے کہ کاویلاشویلی کا انتخاب ناجائز ہے۔زورابیشویلی نے کہا تھا کہ وہ رات محل میں گزاریں گی، اور مظاہرین کو صبح آنے کو کہا۔ان کی مدت ایک جانشین کی تقرری کے ساتھ ختم ہونے والی ہے۔
واضح رہے کہ جارجیا ۲۰۲۴ء کے دوران مظاہروں کی زد میں رہا، مخالفین جارجیائی ڈریم پارٹی پر الزام لگا رہے ہیں کہ وہ ملک کی یورپی یونین میں شمولیت کی عوامی خواہش کے بر خلاف جارجیا کو روس کے قریب لے جا رہے ہیں۔