ہمالیہ کے بارے میں گفتگو کی ، ساتھ ہی ہندوستان کے خلائی پروگرام میں مدد کرنے کی خواہش ظاہر کی ، جلد ہی ہندوستان آسکتی ہیں۔

خلاء سے ہندوستان کیسا نظر آتا ہے؟ یہ سوال سنتے ہی سبھی کو خلاباز راکیش شرما اور سابق وزیر اعظم آنجہانی اندرا گاندھی کے درمیان ہوئے مکالمہ کی یاد آ جاتی ہے۔ اب یہی سوال خلا میں ۲۸۶؍ دن گزارنے کے بعد واپس آنے والی ’ناسا‘ کی ہند نژاد خلائی مسافر سنیتا ولیمز سے بھی کیا گیا ہے۔ ان کا جواب بھی دل کو چھو لینے والا ہے۔ راکیش شرما سے جب اس وقت کی وزیر اعظم اندرا گاندھی نے پوچھا تھا کہ خلاء سے ہندوستان کیسا نظر آتا ہے تو انہوں نےعلامہ اقبال کا مصرع ’سا رے جہاں سے اچھا‘  سنایا تھا ۔ اب چار دہائی بعد خلاباز سنیتا ولیمز سے جب یہ پوچھاگیا تو ان کا جواب تھا ’’ شاندار ‘‘ ۔ سنیتا کہا کہ خلاء سے ہندوستان بالکل شاندار نظر آتا ہے۔ایسا لگتا ہے کہ یہ  اپنی سبھی روایتوں کو اپنے میں سموئے ہوئے زمین پر اپنی موجودگی درج کرارہا  ہے۔ 

یہ بھی پڑھئے: متوقع امریکی اعلان کی وجہ سے شیئر مارکیٹ میں کہرام ، ۱۴؍ سو پوائنٹس کی گراوٹ

واضح رہے کہ سنیتا ولیمز ہندوستان کے بارے میں اکثر باتیں کرتی  ہیں۔ اس بار وہ خلاء سے ہندوستان کا دیدار کرکے مسحور ہو گئیں۔ انہوں نے ہندوستان کی خوبصورتی کی جم کر تعریف کی۔ انہوں نے کہا کہ میں نے پہلے اس کا ذکر اس لہر کی طرح کیا ہے جو واضح طور سے تب ہوئی جب  براعظمی پلیٹیں ٹکرائیں اور پھر جیسے ہی یہ بھارت میں بہتی  ہیں یہ کئی کئی رنگوں میں  نظر آتی ہیں۔ مجھے لگتا ہے کہ جب آپ مشرق سے گجرات اور ممبئی کی طرف آتے ہیں  تو ہندوستان کا مسحور کن نظارہ ہم مبہوت کردیتا ہے۔ پورے ہندوستان میں مجھے لگتا ہے کہ روشنی کا نیٹ ورک نظرآتا ہے اور بڑے شہروں سے چھوٹے شہروں تک پہنچتا ہے۔ رات میں تو یہ منور نظر آتا ہے  جبکہ دن کے دوران یقینی طور سے ہمالیہ توجہ کھینچتا تھا۔
سنیتا ولیمس سے یہ بھی سوال کیا گیا کہ کیا وہ ہندوستانی خلائی پروگرام میں مدد کریں گی۔ انہوں نے کہا کہ وہ ہندوستان آکر مدد کرنا چاہتی ہیں تاکہ ہندوستان میں زیادہ سے زیادہ لوگوں کے ساتھ اپنے تجربات کا اشتراک کریں کیونکہ یہ ایک عظیم ملک اور ایک شاندار جمہوریت ہےـ۔ خلائی اسٹیشن پر ان کے معاون  رہے بُچ ولمور بھی ہندوستان کا دورہ کرنا چاہتے ہیں۔