سونامی سے متاثرہ بحر ہند کے ممالک اگلے ہفتے (۲۶؍ دسمبر ۲۰۲۴ء)ان ۲؍ لاکھ ۲۰؍ ہزارسے زیادہ لوگوں کی یاد منائیں گے جو ۲۰؍ برس قبل’ باکسنگ ڈے‘ سونامی کی تباہی میں ہلاک ہوئے تھے۔

سونامی سے متاثرہ بحر ہند کے ممالک اگلے ہفتے (۲۶؍ دسمبر ۲۰۲۴ءکو )ان ۲؍ لاکھ ۲۰؍ ہزارسے زیادہ لوگوں کی یاد منائیں گے جو ۲۰؍ برس قبل ’باکسنگ ڈے ‘ سونامی کی تباہی میں ہلاک ہوئے تھے۔ سونامی کی یہ لہریں بحر ہند کے آس پاس کےساحلوں سے ٹکرائی تھیں۔ سونامی کی ۲۰؍ ویں برسی پر سمندر کے کنارےیادگاریں اور مذہبی تقریبات پورے ایشیا سمیت انڈونیشیا، سری لنکا، ہندوستان اور تھائی لینڈ میں منعقد کی جائیں گی۔ یاد رہے کہ ۲۶؍ دسمبر۲۰۰۴ء کو کچھ علاقوں میں ۹۸؍ فٹ تک اونچی سونامی لہروں نے ساحلی علاقوں کو صفحہ ہستی سے مٹا دیا تھاجس سے ہزاروں بے گھر ہو گئے تھے اور موسم سرما کی چھٹیوں پر آئے کئی سیاح بھی ہلاک ہوگئے تھے۔ 

یہ بھی پڑھئے: پاکستان:عمران خان اور ان کی اہلیہ کے خلاف القادر ٹرسٹ معاملے میں فیصلہ محفوظ

انڈونیشیا کے شہر باندا آچے میں زندہ بچ جانے والے ۷۰؍ سالہ ماہی گیر بہار الدین زینون نے کہاکہ میرے بچے، بیوی، والد، والدہ اورمیرے تمام بہن بھائی پانی میں بہہ گئے تھے۔ اسی طرح کا سانحہ دوسروں نے بھی محسوس کیا تھا۔ انڈونیشیا میں، جہاں ایک لاکھ ۶۰؍ ہزارسے زیادہ افراد ہلاک ہوئےتھے، سوگوارباندا آچے میں ایک سلسلے کی تقریبات کیلئے جمع ہوں گے، جو مقامی وقت کے مطابق صبح ۸؍بجے شروع ہوں گے۔ اس موقع پر سرکاری اہلکار، این جی او کے نمائندے اور عوام شہر کی عظیم الشان مسجد میں اجتماعی دعا سے قبل باندا آچے میں ایک اجتماعی قبر کا دورہ کریں گے جہاں تقریباً ۵۰؍ ہزارلاشیں دفن ہیں۔