رواں سال کے پاسپورٹ انڈیکس کے سب سے نیچے پاکستان، عراق، ایریٹیریا، یمن اور افغانستان رہے جو بالترتیب ۱۹۵ ویں مقام سے ۱۹۹ ویں مقام پر ہیں۔
EPAPER
Updated: April 04, 2025, 6:03 PM IST | Inquilab News Network | New Delhi
رواں سال کے پاسپورٹ انڈیکس کے سب سے نیچے پاکستان، عراق، ایریٹیریا، یمن اور افغانستان رہے جو بالترتیب ۱۹۵ ویں مقام سے ۱۹۹ ویں مقام پر ہیں۔
نوماد کیپیٹلسٹ پاسپورٹ انڈیکس ۲۰۲۵ء کی تازہ ترین رپورٹ کے مطابق، ہندوستان دنیا کے طاقتور ترین پاسپورٹس کی فہرست میں ۱۴۷ ویں مقام سے گر کر ۱۴۸ ویں مقام پر آ گیا ہے۔ یہ اشاریہ، ٹیکس اور امیگریشن کنسلٹنسی فرم نوماد کیپیٹلسٹ کی جانب سے جاری کیا جاتا ہے جو ہر سال مختلف ممالک کے پاسپورٹس کی طاقت کا جائزہ لیتی ہے۔ اشاریہ میں پاسپورٹس کی درجہ بندی پانچ معیارات کی بنیاد پر کی جاتی ہے: ویزا کے بغیر سفر (۵۰ فیصد نمبرات)، ٹیکس نظام (۲۰ فیصد نمبرات)، عالمی تاثر (۱۰ فیصد نمبرات)، دہری شہریت (۱۰ فیصد نمبرات) اور ذاتی آزادی (۱۰ فیصد نمبرات)۔ اس سال کے اشاریہ میں ہندوستان کا اسکور ۵ء۴۷ رہا۔ ہندوستان، مشرقی افریقی ملک کوموروس کے ساتھ ۱۴۸ ویں مقام پر رہا۔ گزشتہ سال ہندوستان، موزمبیق کے ساتھ ۱۴۷ ویں رینک پر تھا۔
آئرلینڈ کے پاسپورٹ کو اس سال دنیا کا طاقتور ترین پاسپورٹ قرار دیا گیا کیونکہ آئرش شہریوں کو یورپی یونین اور برطانیہ میں رہنے اور کام کرنے کے بہتر حقوق حاصل ہیں۔ سوئزرلینڈ دوسرے مقام پر رہا جبکہ یونان، پرتگال، مالٹا، اٹلی، لکسمبرگ، فن لینڈ، ناروے، متحدہ عرب امارات، نیوزی لینڈ اور آئس لینڈ سر فہرست ۱۰ ممالک میں جگہ بنانے میں کامیاب رہے۔ امریکہ، یورپ کے سان مارینو کے ساتھ ۴۵ ویں مقام پر رہا۔ پاسپورٹ انڈیکس کے سب سے نیچے پاکستان، عراق، ایریٹیریا، یمن اور افغانستان رہے جو بالترتیب ۱۹۵ ویں مقام سے ۱۹۹ ویں مقام پر ہیں۔
یہ بھی پڑھئے: ’ٹرمپ ٹیریف‘ کے نرغے میں کئی ممالک، ہندوستان پر ۲۶؍ فیصد ٹیریف عائد
یاد رہے کہ رواں سال جنوری میں جاری کئے گئے ہینلی پاسپورٹ انڈیکس، جو انٹرنیشنل ایئر ٹرانسپورٹ ایسوسی ایشن کے ڈیٹا پر مبنی ہوتا ہے، میں ہندوستان ۸۰ ویں مقام سے گر کر ۸۵ ویں مقام نمبر پر آ گیا ہے۔