رائزنگ راجستھان سمٹ میں وزیر اعظم نے کہا:پچھلے ۱۰؍ برسوں میں ہندوستان نے اپنی معیشت کا حجم تقریباً دُگنا کر دیا ہے۔

وزیراعظم نریندر مودی نے کہا کہ دنیا کا ہر ماہر، ہر سرمایہ کار ہندوستان کے حوالہ سے بہت پرجوش ہے اور ہندوستان نے پرفارم، ریفارم اور ٹرانسفارم کے منتر پر چلتے ہوئے جو ترقی کی ہے وہ ہر شعبے میں نظر آرہی ہے۔ مودی نے یہ بات پیر کو یہاں رائزنگ راجستھان گلوبل انویسٹمنٹ سمٹ ۲۰۲۴ء کا افتتاح کرنے کے بعد اپنے خطاب میں کہی۔ 
 انہوں نے کہا کہ آزادی کے بعد ۷؍ دہائیوں میں ہندوستان دنیا کی گیارہویں بڑی معیشت بن گیا تھا اور پچھلے۱۰؍ برسوں میں ہندوستان دسویں بڑی معیشت سے ۵؍ویں بڑی معیشت بن گیا ہے۔ پچھلے ۱۰؍ برسوں میں ہندوستان نے اپنی معیشت کا حجم تقریباً دُگنا کر دیا ہے۔ ہندوستان کی برآمدات بھی پچھلے ۱۰؍ برسوں میں تقریباً دُگنی ہو گئی ہیں۔ ایف ڈی آئی بھی۲۰۱۴ء سے پہلے کی دہائی کے مقابلے پچھلی دہائی میں دُگنی سے زیادہ ہو گئی ہے۔ اس مدت کے دوران ہندوستان نے اپنے بنیادی ڈھانچے کے اخراجات کو تقریباً۲؍ ٹریلین روپے سے بڑھا کر۱۱؍ ٹریلین روپے کر دیا ہے۔ 
  انہوں نے کہا کہ ہندوستان کی کامیابی جمہوریت، ڈیموگرافی، ڈجیٹل ڈیٹا اور ڈلیوری کی طاقت کو ظاہر کرتی ہے۔ ہندوستان جیسے متنوع ملک میں جمہوریت اس قدر پنپ رہی ہے، اتنا طاقتور بننا اپنے آپ میں ایک بہت بڑی کامیابی ہے۔ جمہوری ہوتے ہوئے انسانیت کی فلاح، یہی ہندوستان کے فلسفے کا مرکز ہے، یہی ہندوستان کا بنیادی کردار ہے۔ آج ہندوستان کے لوگ اپنے جمہوری حقوق کے ذریعے ہندوستان میں ایک مستحکم حکومت کے لیے ووٹ دے رہے ہیں۔ 

یہ بھی پڑھئے:شام: بشارالاسد ظلم کی ناقابل بیان داستانیں چھوڑ گئے

مودی نے کہا کہ ہماری آبادی یعنی نوجوانوں کی طاقت ہندوستان کی ان قدیم روایات کو آگے لے جا رہی ہے۔ ہندوستان آنے والے کئی برسوں تک دنیا کے سب سے نوجوان ممالک میں شامل رہنے والا ہے۔ ہندوستان کے پاس نوجوانوں کا سب سے بڑا پل ہونے کے ساتھ ساتھ سب سے بڑا ہنر مند نوجوانوں کا گروپ ہوگا۔ اس کے لیے حکومت یکے بعد دیگرے کئی فیصلے کر رہی ہے۔   پچھلی دہائی میں ہندوستان کی نوجوان طاقت نے اپنی صلاحیت میں ایک اور جہت کا اضافہ کیا ہے۔ یہ ایک نئی جہت ہے، انڈیا کی ٹیک پاور، انڈیا کی ڈیٹا پاور۔ آپ سب جانتے ہیں کہ آج ہر شعبے میں ٹیکنالوجی اور ڈیٹا کی کتنی اہمیت ہے۔ یہ صدی ٹیکنالوجی سے چلنے والی، ڈیٹا پر مبنی صدی ہے۔ پچھلی دہائی میں ہندوستان میں انٹرنیٹ استعمال کرنے والوں کی تعداد میں تقریباً چار گنا اضافہ ہوا ہے۔ ڈجیٹل لین دین میں نئے ریکارڈ قائم کیے جا رہے ہیں اور یہ صرف شروعات ہے۔ ہندوستان دنیا کو جمہوریت، ڈیموگرافی اور ڈیٹا کی اصل طاقت دکھا رہا ہے۔ 
انہوں نے کہا کہ ہندوستان نے دکھایا ہے کہ کس طرح ڈجیٹل ٹکنالوجی کی جمہوریت ہر شعبے اور ہر طبقے کو فائدہ پہنچا رہی ہے۔ انڈیا کا یو پی آئی، انڈیا کا بینیفٹ ٹرانسفر اسکیم سسٹم، گورنمنٹ ای-مارکیٹ پلیس، اوپن نیٹ ورک فار ڈجیٹل کامرس ایسے بہت سے پلیٹ فارم ہیں، جو ڈجیٹل ماحولیاتی نظام کی طاقت کو ظاہر کرتے ہیں۔ ہم یہاں راجستھان میں بھی اس کے بڑا فائدہ اور بہت بڑا اثر دیکھنے جا رہے ہیں۔ 
وزیر اعظم نریندر مودی نے راجستھان کے وزیر اعلیٰ بھجن لال شرما اور ان کی پوری حکومت کی تعریف کرتے ہوئے کہا ہے کہ بہت کم وقت میں بھجن لال اور ان کی پوری ٹیم نے بہترین کام کیا ہے۔ چند دنوں میں ریاستی حکومت اپنے وجود کا ایک سال مکمل کرنے جا رہی ہے۔ بھجن لال شرما جس کارکردگی اور عزم کے ساتھ راجستھان کی تیز رفتار ترقی میں مصروف ہیں وہ قابل تعریف ہے۔ غریبوں کی بہبود ہو، کسانوں کی فلاح و بہبود، نوجوانوں کے لیے نئے مواقع پیدا کرنا، سڑکیں، بجلی، واٹر ورکس، ہر قسم کی ترقی اور اس سے متعلقہ تمام کام راجستھان میں تیز رفتاری سے ہو رہے ہیں۔ حکومت جرائم اور بدعنوانی پر قابو پانے میں جس تیزی کا مظاہرہ کر رہی ہے اس سے شہریوں اور سرمایہ کاروں میں نیا ولولہ پیدا ہوا ہے۔ مودی نے کہا، ’’میں نے ہمیشہ یہ مان رکھا ہے کہ ریاست کی ترقی ملک کی ترقی کا باعث بنے گی جب راجستھان ترقی کی نئی بلندیوں پر پہنچے گا۔ ‘‘