غزہ کی وزارت صحت کے مطابق جنگ کے آغاز سے اب تک زخمی فلسطینیوں کی تعداد۸۱؍ ہزار۲۶؍ ہوگئی ہے۔

مقبوضہ فلسطین کے محصور علاقے غزہ میں ۷؍ اکتوبر۲۰۲۳ء سے جاری اسرائیلی ظلم اور جارحیت کے نتیجے میں شہید ہونے والے فلسطینیوں کی تعداد۳۶؍ ہزار سے تجاوز کرگئی ہے۔ غزہ کی وزارت صحت کے مطابق۷؍ اکتوبر سے اب تک غزہ میں اسرائیلی حملوں میں ۳۶؍ ہزار۵۶؍ فلسطینی شہید ہوچکے ہیں۔ غزہ کی وزارت صحت کے مطابق جنگ کے آغاز سے اب تک زخمی ہونے والے فلسطینیوں کی تعداد ۸۱؍ ہزار۲۶؍ ہوگئی ہے۔ 
 اتوار کی شب غزہ کے جنوبی علاقے رفح میں اسرائیلی فوج نے بے گھر فلسطینیوں کے کیمپ کو فضائی حملے کا نشانہ بنایا جس کے نتیجے میں کیمپ میں آگ بھڑک اٹھی۔ 

یہ بھی پڑھئے: جنگ میں کوئی بھی ملک تنہا روس کا مقابلہ نہیں کر سکتا: یوکرینی صدر ولادیمیر زیلنسکی

غزہ کی وزارت صحت کے مطابق کیمپ پر ہونے والے فضائی حملے اور اس کے بعد لگنے والی آگ سے۴۵؍ فلسطینی شہید ہوئے جن میں سے ۲۳؍خواتین، بچے اور بزرگ تھے۔ 
 دوسری جانب مغربی کنارے میں بھی اسرائیلی فوج اور آبادکاروں کے ظلم و ستم جاری ہیں۔ اقوام متحدہ کے آفس فار دی کوآرڈینیشن آن ہیومینیٹیرین افیئرز (او سی ایچ اے) کے تازہ ترین اعداد و شمار کے مطابق مغربی کنارے میں ۷؍ اکتوبر۲۰۲۳ء سے اب تک اسرائیلی فوج اور آبادکاروں کے حملوں میں ۴۸۹؍ فلسطینی شہید ہوچکے ہیں جن میں ۱۱۷؍ بچے بھی شامل ہیں۔ مغربی کنارے میں اسی عرصے کے دوران ۵؍ ہزار سے زائد فلسطینی زخمی بھی ہوئے جن میں ۷۹۰؍ بچے شامل ہیں۔