زائد از ۴۸۰؍ فضائی حملوں کے ساتھ ہی صہیونی فوج ۵۰؍ سال میں پہلی بار بفرزون کو عبور کرکے شامی حدود میں داخل ہوگئی۔

 شام پر بدھ کو لگاتار اسرائیل نے فضائی حملے کئے جس میں بطور خاص ملک کے بحری بیڑے اور بندرگاہوں کو نشانہ بنایاگیا۔ سی این این کی ایک رپورٹ  کے مطابق تل ابیب نے بشارا لاسد حکومت کے گرنے کے بعد سے شام کی فوجی تنصیبات پر ۴۸۰؍ سے زائد حملے کئے ہیں نیز بری فوج گولان کی پہاڑیوں پر بفرزون کو پار کرتے ہوئے  ۵۰؍ سال میں پہلی بار شامی حدود میں داخل ہوگئی ہے۔ اس دوران نیتن یاہو نے مشرق وسطیٰ کی شکل کو بدل دینے کا پُراسرار عزم کیا ہے۔  انہوں نے بشارالاسد حکومت کے تختہ پلٹ کو ’’نیا اور ڈرامائی باب‘‘ سے تعبیر کیا ہے۔ 

یہ بھی پڑھئے: حادثے کا اثر: کرلا اسٹینڈ سے بیسٹ بس خدمات بند، ہزاروں مسافر پریشان

اسرائیلی فورسیز کی جانب سے جاری بیان میں کہا گیا ہے کہ اس کے جہازوں نے  البیضا اور اللاذقيہ کی بندرگاہوں کو نشانہ بنایا جہاں شامی بحریہ کے۱۵؍بحری جہاز لنگر انداز تھے۔ اسرائیلی جنگی طیاروں نے شام کے مختلف علاقوں میں متعدد فوجی اور عسکریت پسندوں کے اہداف پر ۵۰۰؍ کے قریب  فضائی حملے  کئے  جبکہ زمینی افواج کو شام اور مقبوضہ گولان کی پہاڑیوں کے درمیان غیر فوجی بفر زون میں منتقل کر دیا گیا ہے۔