سپریم کورٹ نے ایک صحافی کو عبوری راحت دیتے ہوئے اپنے حکمنامہ میں کہا کہ ہندوستانی آئین کی دفعہ ۱۹(۱) کے تحت صحافیوں کے آزادی اظہار سے متعلق حقوق کو تحفظ فراہم کیا گیا ہے۔

سپریم کورٹ نے واضح کیا کہ صحافیوں کی تحریروں کے حکومت مخالف ہونے کی بنیاد پر ان کے خلاف فوجداری مقدمات درج نہیں کئے جاسکتے۔ جسٹس رشی کیش رائے اور ایس وی این بھٹی کی بنچ نے جمعہ کو صحافی ابھیشیک اپادھیائے کے خلاف دائر مقدمہ کی سماعت کرتے ہوئے یہ تبصرہ کیا۔ سپریم کورٹ نے اپادھیائے کو عبوری راحت دیتے ہوئے اپنے حکمنامہ میں کہا کہ ہندوستانی آئین کی دفعہ ۱۹(۱) کے تحت صحافیوں کے آزادی اظہار سے متعلق حقوق کو تحفظ فراہم کیا گیا ہے۔ جمہوری ملک میں اظہار خیال کی آزادی کا احترام کیا جاتا ہے۔ اگر کسی صحافی کی تحریروں کو حکومت مخالف خیال جاتا ہے، تو صرف اس بنیاد پر اس کے خلاف فوجداری مقدمات درج نہیں کئے جانے چاہئے۔

یہ بھی پڑھئے: لبنان سے ۲۰۰؍ سے زائد چینی شہریوں کا انخلاء کیا گیا ہے: چینی حکومت

عدالت نے اپادھیائے کی عرضی پر اتر پردیش حکومت سے بھی جواب طلب کیا۔ واضح رہے کہ ۱۹ ستمبر کو اپادھیائے نے سوشل میڈیا پر ایک پوسٹ کے ذریعے اتر پردیش انتظامیہ میں تقرریوں کے متعلق ذات پات پر مبنی تعصب پر سوال اٹھائے تھے۔ اس پوسٹ کے بعد اپادھیائے کے خلاف، لکھنؤ کے پنکج کمار نامی شخص نے نفرت انگیز تقریر کرنے، قومی یکجہتی کے خلاف بیان دینے، مذہبی جذبات کو ٹھیس پہنچانے اور ہتک عزت کی دفعات کے تحت مقدمہ کردیا۔ 
اپادھیائے نے اسے انہیں خاموش کرنے کی کوشش قرار دیا۔ انہوں نے کہا کہ میرے خلاف مقدمہ کرکے ریاست کی قانون نافذ کرنے والی مشنری کا "غلط استعمال" کیا جارہا ہے۔