جسٹس گوائی نے زور دیا کہ عدالت میں اور عدالت سے باہر جج کا طرز عمل عدالتی اخلاقیات کے اعلیٰ ترین معیارات کے مطابق ہونا چاہئے۔

سپریم کورٹ جج جسٹس بھوشن آر گوائی نے سنیچر کو ججوں کے درمیان سیاست دانوں یا نوکر شاہوں کی سرعام تعریف کرنے اور استعفیٰ دینے کے بعد الیکشن لڑنے کے رجحان کی سخت مذمت کی۔ جسٹس گوائی نے خبردار کیا کہ اس طرح کے اقدامات سے عدلیہ پر عوام کے اعتماد کو شدید نقصان پہنچتا ہے۔ احمد آباد میں گجرات اسٹیٹ جوڈیشل آفیسرز کانفرنس میں "عدلیہ میں اعتماد کی کمی" کے موضوع پر خطاب کرتے ہوئے جسٹس گوائی نے کہا کہ بنچ پر اور بنچ سے باہر جج کا طرز عمل عدالتی اخلاقیات کے اعلیٰ ترین معیارات کے مطابق ہونا چاہئے۔ اگر کوئی جج کسی سیاست دان یا نوکر شاہ کی تعریف کرتا ہے تو اس سے مجموعی طور پر عوام کا عدلیہ پر اعتماد متاثر ہو سکتا ہے۔ 

یہ بھی پڑھئے: میانمار: لڑائی سے بھاگنے والے افراد کی کشتی پلٹ گئی، ۷؍ ہلاک، ۳۰؍ لاپتہ

انہوں نے مزید کہا کہ اگر کوئی جج فوری طور پر الیکشن لڑنے کیلئے اپنے عہدے سے استعفیٰ دے دیتا ہے تو اس سے ان کی غیر جانبداری کے بارے میں عوامی تاثر متاثر ہو سکتا ہے۔ جسٹس گوائی نے زور دیا کہ عدلیہ کو حکومت کی قانون سازی اور انتظامی شاخوں سے آزاد رہنا چاہئے۔ اختیارات کی علیحدگی میں کسی قسم کی کمی عدالتی غیر جانبداری پر عوام کے اعتماد کو مجروح کرتی ہے۔ عدلیہ کی خودمختاری میں سیاسی مداخلت، قانون سازوں کی بالادستی، یا انتظامی مداخلت کے باعث غیر جانبدارانہ انصاف کا تصور کمزور ہو جاتا ہے۔