گورنمنٹ میڈیکل کالج سری نگر میں احتجاج کے دوران ملزمین کو جلد سے جلد پھانسی کی سزا دینے کا مطالبہ، ڈاکٹروں کے تحفظ کو یقینی بنانے پر زور۔

 گورنمنٹ میڈیکل کالج (جی ایم سی) سری نگر کے ڈاکٹروں نے سنیچر کوتیز بارش کے درمیان کولکاتا عصمت دری اور قتل کیس کیخلاف احتجاج درج کیا۔ اس دوران خاطیوں کو فوری طور پر سزادینے کا مطالبہ کیا گیا۔ 
احتجاج کرنے والے ڈاکٹروں کے ہاتھوں میں بینرس تھے اور وہ اس افسوس ناک واقعے کیخلاف نعرہ بازی کر رہے تھے۔ انہوں نے ملزمین کو جلد سے جلد پھانسی کی سزا دینے کا مطالبہ کیا۔ ایک ڈاکٹر نے میڈیا سے بات چیت کرتے ہوئے کہا،’’ `ہم دن رات عوام کی خدمت کرتے ہیں لیکن ہم کو ہی نشانہ بنایا جا رہا ہے۔

یہ بھی پڑھئے:کشمیر: انسانی حقوق کے پاسدار خرم پرویز کے جیل میں ۱۰۰۰؍ دن مکمل

‘‘انہوں نے کہا،’’کولکاتا کے واقعے سے معلوم ہوا کہ ہمارےسماج میں ڈاکٹر خاص طور پر خواتین محفوظ نہیں ہیں۔ ہم یہاں جمع ہوئے ہیں تاکہ متاثرہ ڈاکٹر کے ساتھ یکجہتی کااظہار کیا جائے۔ ہمارا مطالبہ ہے کہ ڈاکٹروں کے تحفظ کو یقینی بنایا جائے اور کولکاتہ واقعے میں ملوث ملزمین کو فوری طور پر سخت سے سخت سزا دی جائے۔ ‘‘
 ایک خاتون ڈاکٹر نے کہا،’’ `ہم انڈین میڈیکل اسوسی ایشن (آئی ایم اے) کی حمایت میں جمع ہوئے ہیں۔ ہمارا مطالبہ ہے کہ ڈاکٹروں کے تحفظ کو یقینی بنایا جائے جو کسی بھی سیکوریٹی کے بغیر اسپتالوں میں کام کرتے ہیں۔ ‘‘