آج بین الاقوامی یوگا ڈے کے موقع پر کویت میں ہندوستانی سفارتخانے میں یوگا کی تقریب کا اہتمام کیا گیا اور ۱۲؍ جون کو منگاف میں ہوئے آتشزدگی کے متاثرین کا خراج پیش کیا گیا۔ اس دوران چند منٹوں کیلئے خاموشی اختیار کرکے انہیں یاد کیا گیا۔

کویت میں ہندوستانی سفارتخانے نے جمعہ کو منگاف میں آتشزدگی کے المناک واقعہ میں جاں بحق ہونے والوں کی یاد میں چند منٹ کی خاموشی اختیار کی۔ آتشزدگی میں ۴۵؍ ہندوستانی فوت ہوئے تھے۔ ہندوستانی سفارتخانے نے ۲۱؍ جون کو یوگا کا عالمی دن منانے کیلئے ایک تقریب کا اہتمام کیا تھا۔ انڈین ایمبسی نے ایکس پر کہا کہ ’’اس تقریب کے دوران، حال ہی میں المناک منگاف آتشزدگی کے واقعے میں ضائع ہونے والی قیمتی جانوں کی یاد میں تمام شرکاء کی طرف سے چند منٹ کی خاموشی اختیار کی گئی۔‘‘

During #IDY2024 event, a few minutes of silence was observed by all attendees in memory of precious lives lost in the tragic Mangaf fire-incident recently.@ANI pic.twitter.com/Df5k5G7lQY

— India in Kuwait (@indembkwt) June 21, 2024

یاد رہے کہ ۱۲؍ جون کو کویت کے منگاف میں مزدوروں کی رہائش گاہ میں آگ لگنے کے واقعے میں کم از کم ۴۵؍ ہندوستانی ہلاک ہوگئے تھے۔ مرنے والوں میں سات کا تعلق تمل ناڈو سے، تین کا آندھرا پردیش سے اور ایک ایک کا تعلق بہار، ادیشہ، کرناٹک، مہاراشٹر، اتر پردیش، جھارکھنڈ، ہریانہ، پنجاب اور مغربی بنگال سے تھا، اس کے علاوہ کیرالا کے ۲۳؍ لوگ تھے۔ 

یہ بھی پڑھئے: اقوام متحدہ: سوڈان میں انسانی امداد کی ناکافی رسائی کے سبب بھکمری کا خطرہ

اس تقریب میں متعدد یوگا ٹرینرز، سفارتخانے کے اہلکار اور کویت میں مقیم ہندوستانی باشندوں نے شرکت کی۔ واضح رہے کہ امسال یوگا کا ۱۰؍ واں بین الاقوامی دن منایا جا رہا ہے۔ دسمبر ۲۰۱۴ء میں اقوام متحدہ نے متفقہ طور پر ہندوستان کی طرف سے ۲۱؍ جون کو یوگا کا عالمی دن منانے کیلئے ایک قرار داد منظور کی جو شمالی نصف کرہ میں سال کا سب سے طویل دن ہے۔