پتھروں اور مٹی کو ہٹانے کا کام پچھلے ۳۶؍ گھنٹے سے جاری ہے، بلاسٹ مشین کی بھی مدد لی جارہی ہے۔

رتناگری کولہاپور روڈ پر انوسکورا گھاٹ میں سنیچر کو لینڈسلائیڈنگ کا حادثہ پیش آیا ہے۔ صبح ۶؍بجے کے قریب یہاں تودہ کھسکنے سے ہائی وے پر بڑی چٹانیں  گرگئی ہیں۔ مٹی اورپتھروں  کو ہٹانے کا کام پچھلے ۳۶؍  گھنٹوں سے جنگی پیمانے پر جاری ہے۔ تاہم اب تک راستہ صاف نہیں  ہوپایا ہے۔ اس باعث رتناگیری سے کولہاپور کے درمیان گاڑیوں  کی آمدورفت ٹھپ ہوگئی ہے۔ 
  اےبی پی ماجھا کی رپورٹ کے مطابق تودہ کھسکنے سے راستےپر بھاری چٹانوں  آگری ہیں، انہیں توڑنے کیلئے بلاسٹ مشین منگوائی گئی ہے۔ انتظامیہ کا کہنا ہے کہ راستے سے مٹی اور چٹانیں ہٹانے کاکام پیر کو مکمل ہوجائے گا۔ 

یہ بھی پڑھئے:امراوتی : گائے کو بچانے کے دوران بس پلٹ گئی

 خیال رہے کہ سندھودرگ کے فونڈا گھاٹ میں ۴؍ دن قبل ۳۰۰؍ فٹ گہری کھائی میں  مال بردار ٹرک گرگیا تھا۔ اسے تین کرینوں  کی مدد سے نکالنے کیلئے گھاٹ پر ۳؍ گھنٹے کیلئے گاڑیوں کی آمدوفت بند رکھی گئی تھی۔ اس باعث کئی کلومیٹر تک ٹریفک جام لگ گیا تھا۔ معلوم ہوکہ سندھو درگ میں  سنیچر اور اتوار کو ہونیوالی بارش کے سبب یہاں  کی کرلی ندی میں سیلابی صورتحال پیدا ہوگئی ہے۔ ضلع میں  چوبیس گھنٹوں  کے دوران ۹۳؍ایم ایم بارش ریکارڈ کی گئی ہے۔ بحرعرب میں  ہوا کاکم دباؤ کا پٹّہ بننے سے کوکن میں  پچھلے تین دنوں سے موسلاد ھار بارش ہورہی ہے۔