وزیر داخلہ سے بابا صاحب امبیڈکر سےمتعلق بیان پر معافی مانگنے کا مطالبہ ، سومناتھ سوریہ ونشی کی موت پر بھی آواز اٹھائی گئی

مرکزی وزیر داخلہ امیت شاہ کے بابا صاحب امبیڈکر کے تعلق سے دیئے گئے قابل اعتراض بیان اور پربھنی میں دلت نوجوان  کی حراستی موت، اور بیڑ میں سرپنچ سنتوش دیشمکھ کے  قتل کے خلاف ناندیڑ کانگریس نے منگل کو احتجاج کیا۔ کانگریس کارکنان نے ریلوے اسٹیشن سے متصل ڈاکٹر بابا صاحب امبیڈکر کے مجسمے سے لے کر ناندیڑ کلکٹرآفس تک ایک ریلی نکالی اور کلکٹر دفتر پہنچ کر  ضلع کلکٹر کو ایک میمورنڈم پیش کیا۔ میمورنڈم میں آئین اوربابا صاحب کے خلاف ہو رہی سیاست کی شدید مذمت کی گئی۔ پارلیمنٹ میں امیت شاہ کے ڈاکٹر بابا صاحب امبیڈکر کے تعلق سے توہین آمیز بیان کو شرمناک قرار دیتے ہوئے ان سے معافی مانگنے اور انہیں فوری استعفیٰ دینے کا مطالبہ کیا گیا۔کانگریس نے پربھنی میں سومناتھ سوریہ ونشی کی حراستی موت کیلئے ذمہ دارپولیس افسران کے خلاف قتل کا مقدمہ درج کرنے اور انہیں گرفتار کرنے کا مطالبہ کیا۔

یہ بھی پڑھئے: کانگریس کا بیلگاوی میٹنگ میں گاندھی جی کے ستیہ گرہ کو’نئے ستیہ گرہ‘ میں تبدیل کرنے کااعلان

اسی طرح بیڑ میں سرپنچ سنتوش دیشمکھ کے قتل کے پس پردہ سیاسی لیڈروں کو بے نقاب کرکے ان کے خلاف سخت قانونی کارروائی کی بھی مانگ کی گئی۔ اس احتجاج میں ناندیڑ سے کانگریس کے رکن پارلیمان رویندر چوان،کانگریس ضلع صدر بی آر کدم، شہر صدر عبد الستار، سریش گائیکواڑ،سریش ہٹکر، وٹھل پاوڑے کے علاوہ بڑی تعداد میں پارٹی کارکنان نے شرکت کی۔ مظاہرین نے آئین کے تحفظ اور انصاف کی فراہمی کیلئے حکومت سے مؤثر اقدامات کا مطالبہ کیا۔ ریلی کے دوران حکومت کے خلاف نعرے لگائے گئےاور عزم کیا گیا کہ آئین کی حفاظت اوردلتوں کے حقوق کا دفاع ہرحال میں کیا جائے گا۔ مظاہرین نے الزام لگایا کہ حکومت دلتوں کو نظرانداز کررہی ہےاورجان بوجھ کر سماج کو تقسیم کرنے والے بیانات دیئے جا رہے ہیں۔